The Definitive Guide to Living in the Capital , Cairo , Egypt

مطاعم
بينوي – Pinoy

بينوي: مطعم فليبيني واعد في القاهرة

تم التقييم بواسطة
Salma Anderson
قيم
قيم الآن
بينوي: مطعم فليبيني واعد في القاهرة

المطبخ الآسيوي منتشر بشكل رهيب في القاهرة من المطاعم الصيني والكوري للياباني والتايلاندي. مطبخ شرقي واحد مش موجود على الساحة وهو: المطبخ الفلبيني."بينوي Pinoy" – ومعناه "من أصل فلبيني" – قدر يسد الفراغ ده ويقدم لنا الأكل الفلبيني في القاهرة.

مدخل المكان مميز بقضبان حديد على الشباك والباب يشبه شكل المكاتب. لما دخلنا اكتشفنا إن المكان أقرب لغرفة طعام في بيت. الفرش هناك من عند أيكيا – ودي فكرة جديدة على مطاعم القاهرة –عبارة عن كام ترابيزة لفردين وقعدة كبيرة مشتركة. مشكلة أجواء المكان كانت في الإضاءة الفلوروسنت بتاعت المستشفيات، لكن أنقذها الورد الصناعي الجميل على الحيطان.

قعدنا قريب من التليفزيون بس الغريب إن مافيش أي حد يستقبلنا. صاحبة المكان وهي سيدة فلبينية كانت قاعدة على شمالنا وبتتفرج على برنامج مع صديقتها. الوصف المكتوب في المنيو كان مغري وفي حاجات في المنيو عليها هاشتاج. طبعًا الكلام شكله حلو بس كنا محتاجين توضيح أكثر لمكونات الأكل ودرجة الشطشطة في كل وجبة.

اسمحوا لنا يا جماعة نطلب علشان جعانين. بسرعة طلبنا اثنين Siopao ودول دامبلينج محشيين فراخ مع صوص سويت أند تانجي قريب للتشوتني chutney (15 جنيه) (وده عبارة عن صوص زي المربى بس مش مسكر مكون من بصل وجزر). أما المشروبات فالمتاح للأسف كان صنفين غير المشروبات الغازية والمشروب السخن الوحيد كان Salabt(17 جنيه) وده شاي بالزنجبيل.

نتكلم الأول عنSiopao   اللي كان ثقيل جدًا من غير أي نكهة مميزة، بس الحلو إنه كان دافي وفتح نفسنا للأطباق الرئيسية وهي أدوبونج مانوك Adobong Manok وده عبارة عن فراخ بالخل وصويا صوص وثوم (48 جنيه) ومعاه طبق ادوبونج مانوك سا جاتا Adobong Manok Sa Gata (58 جنيه) وهو نفس الطبق ومعاه حليب بجوز الهند. الواضح إن الطبق ده هو الطبق الشعبي في الفلبين. كنا عايزين كمان نجرب بيكول إكسبريس Bicol Express بس للأسف ماكانش موجود يومها مع أطباق ثانية (غالبًا علشان مشكلة الاستيراد الموجودة في مصر حاليًا).

الأكل كان طِعم جدًا وكميته هايلة، بس إحنا مسكنا نفسنا وماخلصناش عليه عشان نسيب مكان للحلو. اختيارنا للحلو كانUbe Halaya، وهو عبارة عن بطاطا بنفسجية مهروسة وعليها مربى وحليب مبخّر (24 جنيه). الحلو بصراحة كان حلو وعامل زي الموس في قوامه وطعمه المسكر بغض النظر عن اللون البنفسجي والخضروات الموجودة فيه.

تجربتنا الأولانية مع الأكل الفلبيني (والتليفزيون) صعب تتنسي. بينوي يتميز عن باقي المطاعم الآسيوية بطعم الأكل البيتي الأصيل. نفسنا الزيارة الجاية تكون بقية الأطباق موجودة وطعمها لذيذ زي اللي جربناهم.

.

نصيحة 360

استفسر من الجرسون عن مكونات الطبق لو المنيو مش واضحة.

أحسن حاجة

البطاطا المهروسة البنفسجية.

أسوأ حاجة

أطباق كثيرة في المنيو مش موجودة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح