The Definitive Guide to Living in the Capital , Cairo , Egypt

ناس كتير سمعوا عن تابلا لونا أخصائي واستشاري ورئيس قسم المطبخ اللاتيني، لكن مش كتير اللي جربوه، يمكن علشان الموضوع غريب عليهم شوية. من العوامل اللي بعدت الناس السبورة اللي مش موضح عليها تفاصيل الأطباق، بس أخيرًا عملوا منيو مطبوعة وبكده مفيش حجة تمنع زيارتهم.

أول حاجة هتقابلك لما تدخل هي المطبخ على الشمال، وترابيزات وكراسي خشب حمراء وصفراء على اليمين، مع ترابيزتين كبار للأعداد الكبيرة. تابلا لونا لسه معلقين السبورة المكتوب عليها المنيو على الحيطة، وموفرين كمان منطقة آوت دوور هايلة.

ابتدينا بشوية شيلي ناتشو (64  جنيه) مع طبق Empanadas  وده ثمنه (33جنيه) من المقبلات. الشيلي ناتشو ببساطة عبارة عن عيش تورتيلا عليه تشيلي كون كارني بالتوابل اللذيذة مع كمية جبنة سايحة هايلة ومش طاغية على طعم باقي مكونات الأكل، وكمان ساور كريم وطماطم وزيتون أسود. مفيش أحلى من كده بصراحة.

نقدر نقول نفس الكلام الجميل على طبق  Empanadas De Queso الأرجنتيني بعجينته الذهبية اللذيذة وقوامه الهش اللي ماسك الحشو كويس جدًا. أما الحشو نفسه فصوص جبنة وسلاطة ذرة مشطشطة شوية وفيها طعم توابل هايل. الطبق كمان بيتقدم معاه صوص chimichurri تحفة، بس بصراحة Empanadas نفسها كانت روعة ومش محتاجة أي مساعدة خارجية.

خلونا نروح بسرعة على الأطباق الرئيسية اللي طلبنا منها Duck au Papaya وده ثمنه 120 جنيه، وده عبارة عن شرائح بط مشوية مدهونة بطبقة مسكّر ومعاها قطع عيش تورتيلا مدوّرة وسلاطة تفاح أخضر وبابايا. هو الطبق ممكن نوصفه بإنه قطع تاكو معمولة من البط وبتجمع مكوناتها بنفسك بنفسك. جايز لحم البط كان ناشف شوية، بس الطعم العام للأكل كان رهيب، خصوصًا مع سلاطة التفاح الأخضر بطعمها اللاذع المميز والدريسينج القوي اللي عمل دويتو هايل مع البابايا.

جربنا كمان الستيك الأسطوري Huancaina Fillet (٣٥٠ جنيه) اللي معاه طبق سلاطة جرجير وخس معمولين بخل، مع بطاطس بصوصات Huancaina وchimichurri. طعم التوابل والبهارات الجميل كان بيتكلم بالنيابة عن الستيك اللذيذ المستوي medium-well. مفيش اتنين يختلفوا على القوام الغني لصوص Huancaina وطعم الجبنة الجميل مع نكهة مدخنة لذيذة اللي نقلوا البطاطس لمستوى جديد من الحلاوة. أما صوص chimichurri– المكون من ثوم وبقدونس – فهو ببساطة أحسن صوص ممكن تأكله مع الستيك ده. واضح من الحجم المكتوب إن الستيك ضخم جدًا وممكن يكفي فردين مستريح. طبعًا لو عايز تدوس فيه لوحدك فأنت حر!

خلصت أكلتنا الخرافية بطبق Torta De TresLeches(٤٥ جنيه)، وهو عبارة عن كيكة أسفنجية مسقية ثلاثة أنواع لبن أبرزهم هو اللبن المكثف، وعليها ميرينجي حافظ على قوام الكيكة. بصراحة مهما كان الطبق مليان سعرات فالموضوع يستاهل.

ما بين الخدمة الممتازة والأجواء المريحة، وطبعًا معاهم الأكل المعمول بمزاج والمنيو المتنوعة، نقدر نقول إن مافيش حاجة ناقصة. تابلا لونا ابتدوا الحكاية من ٣ سنين، بس المهم إنهم حافظوا على مستواهم طول الوقت.