The Definitive Guide to Living in the Capital , Cairo , Egypt

مطاعم
تافولينو – Tavolino

تافولينو: طعم أصلي وأطباق مبتكرة في مطعم إيطالي فخم

  • 5 شارع بهجت علي خلف فندق أم كلثوم، الزمالك.
  • إيطالي
تم التقييم بواسطة
Ramy Soliman
قيم
قيم الآن
تافولينو: طعم أصلي وأطباق مبتكرة في مطعم إيطالي فخم

إحنا عارفين إن مافيش أكتر من المطاعم الإيطالي في كايرو، بس برضه معظمنا متفقين إن قليل منهم اللي بيعرف يعمل الصح. تافولينو من أحسن المطاعم اللي بتعمل أكل إيطالي بجد.

لو بصيت على المطعم الموجود في شارع متفرع من أبو الفدا في الزمالك هتفتكره صغير، لكن الموضوع من جوه حاجة تانية. المطعم مميز بديكورات بسيطة بحوائط من الحجر الأبيض مع لمسات من الخشب وبراويز أبيض وأسود ومرايات مثلثة، ويمكن السلبية الوحيدة كانت الإضاءة الصفراء.

ننسى الديكورات شوية ونروح للأكل، والبداية مع كانيلوني (70 جنيه) من “المنيو الإيطالي الجديدة”، والمنيو دي ميزتها أنهم مدخلين فيها أفكار جديدة على الأكل الإيطالي التقليدي. ست قطع كانيلوني مستويين كويس جدًا وعليهم صلصة طماطم – طعمها قريب من صوص المارينارا –وصوص بيستو. شوية صوص الجورجونزولا عملوا طعم مميز، وبصراحة الطبق ده أثبت إن تافولينو هو أحسن واحد يوفق نكهات الأكل مع بعض ويعمل منهم أكلة لذيذة.

من الحاجات اللي جربناها من “المنيو الإيطالي الجديدة” تندرولين على الحطب (235 جنيه)، وده بيكون ستيك تندرولين مستوي medium-well على معجنات محشية مشروم سوتيه وسبانخ وبصل، ومعاهم صوص ثوم حلو ومربى بلو بيري على بصل بطعمها الحلو والحادق المميز. بصراحة الطبق كان مبهر، مش بس علشان طعم الستيك الرائع الغني بالتوابل الإيطالية اللذيذة، العجينة المحشية مشروم كانت مقرمشة وطعم المربى الرائع مع صوص الثوم المسكر عملوا طبق خيالي.

مع أخر طبق قررنا نرجع لقواعدنا سالمين ونطلب ريزوتو ألا بيسكاتورا (120 جنيه). الطبق كان غني بالكريمة والتتبيلة القوية مع جمبري وبلح بحر، وكان ممكن الطبق يكون مثالي لولا إن الكابوريا كانت مش ماسكة نفسها بزيادة والكاليماري صعب المضغ.

من الحاجات اللي قللت من قوة تافولينو إن وقت زيارتنا طبق الحلو الوحيد الموجود كان آيس كريم أند سوربيت (50 جنيه) اللي بيتكون من 3 بولات آيس كريم من موفنبيك.

كل اللي فات حاجات بسيطة مش هتقلل من جمال الأكلة الرائعة، وبصراحة تافولينو فاجئونا بطعم الأكل المختلف، خصوصًا الحاجات اللي جربناها من “المنيو الإيطالي الجديدة”، واللي ساعدتهم أنهم يتميزوا عن باقي المطاعم الموجودة على الساحة. تافولينو مش مطعم إيطالي عادي.

نصيحة 360

ملاك تافولينو هم أصحاب مطعم إل ديفينو، وبكده ممكن تطلب بيتزا من عندهم لو حبيت.

أحسن حاجة

"المنيو الإيطالي الجديدة" روعة.

أسوأ حاجة

صنف حلو واحد كان متاح يوم زيارتنا.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح