The Definitive Guide to Living in the Capital , Cairo , Egypt

نفسنا يوم نقول أننا خلاص كتبنا عن كل محلات ومطاعم شارع
جامعة الدول العربية، لكن واضح أن ده مش هـ يحصل قريب، مع اكتشافاتنا المتتالية
للأماكن المخفية في الشارع العملاق، وآخر اكتشاف كان مطعم «تري بيان – Tres Bien» الموجود في نهاية الشارع من
ناحية شارع السودان، جنب مطعم فطائر «تيبيستيTebesty – » واخد ناصية كده ومش هـ يكون واضح
وأنت ماشي بسرعة في الشارع الرئيسي.

المحل كان هادئ ورايق جدًا وقت زيارتنا، تقريبًا ما كانش
فيه حد غيرنا بـ يطلب أكل أو قاعد على الترابيزات القليلة في الداخل، لدرجة أننا
قلقنا من احتمالية أن الأكل يكون سيء لأن مش منطقي يكون مطعم في المكان الحيوي ده
ومافيش ولا زبون بـ يأكل هناك. لكن تجربتنا أثبتت أن المشكلة في الزبائن مش في
المحل والأكل كان مفاجأة بكل المقاييس، واستنتجنا أن سبب الروقان ده أن المحل مش
واضح للمارة.

المنيو عبارة عن ساندويتشات لحوم ودجاج بحجم وسط وحجم
كبير، أسعارها من 15 لـ 21 جنيه، وساندويتشات جمبري وسي فوود وفياجرا (21 لـ 25
جنيه) وممكن تضيف 6 جنيه لأي ساندويتش ويبقى كومبو معاه بطاطس وبيبسي، وفيه وجبات
بـ تبقى عبارة عن أرز وبطاطس وقطع فراخ أو لحوم أو جمبري أو كبدة إسكندراني،
وسلاطات ومخللات.

جربنا الشيش طاووق (حجم الوسط بـ 12 جنيه) وكان الحشو
فيه كثير ومشبع فعلًا، لكن المفاجأة كانت الطعم الرائع والتسوية الممتازة لقطع
الفراخ والفلفل والطماطم، ثاني مفاجأة كانت ساندويتش شاورمة الفراخ (12.5 جنيه)
والشاورمة عند «تري بيان» لها خلطة خاصة وحسينا بطعم مختلف لها عن أي مكان ثاني،
مع البطاطس المقرمشة والبيبسي كان رائع جدًا وحسينا للمرة الثانية أن المكان ده مش
بـ يهزر، ومسك الختام كان ساندويتش الجمبري الجامبو (21 جنيه)، جمبري كبير مقلي
بخلطة مقرمشة وعليه مايونيز وخيار مخلل، والعيش الفرنساوي فريش وطري. وفي المشهيات
جربنا الكول سلو (3.5 جنيه) وكانت شبه نظيرتها في كنتاكي جدًا، بس كمية أكبر.
وعرفنا بعد الزيارة من أصدقاء جربوا المحل أكثر من مرة أنه أصلًا مشهور بالساندويتشات
(خاصة الفراخ الكرسبي والفاهيتا) والجمبري المقلي.

المطعم عامل عروض تخفيض لو هـ تشتري ساندويتش أو وجبات
معينة ممكن تضيف 2 جنيه فقط وتأخذ الكومبو كامل، وواضح أن ده لفترة محدودة، لكن ده
ما يمنعش أن الأسعار قليلة وأكيد هـ تشبع وتتكيف كمان من الطعم وآخرك تدفع 30 جنيه
لو كنت لوحدك، والسعر مش بـ يفرق لو هـ تأكل داخل المحل أو تيك آواي، لأنك بـ تدفع
على الكاشير قبل ما تأكل زي مطاعم أمريكانا.

«تري بيان» مطعم أكلات سريعة وساندويتشات مثالي لآخر
الشهر، والطعم مفاجأة، والخدمة جيدة ومحترفة، ودائمًا فرع المهندسين مش زحمة، بـ
نرشحه بشدة للمترددين على شارع جامعة الدول والساكنين في المناطق المحيطة به.