The Definitive Guide to Living in the Capital , Cairo , Egypt

رنا شرف

لو بتحب الأكل والفن يبقى هتكون سعيد لو لقيت نفسك في مطعم بيقدم أكل بجودة عالية، وفي نفس الوقت بيقدم تجربة فنية بصرية مبهجة. وده اللي لقيناه مؤخرًا أثناء زيارتنا لمطعم تشارلي تشابلن. هناك، على بوابة المطعم، هيستقبلك ممثل بيؤدي شخصية “تشابلن” بطريقته الكوميدية وحركاته المميزة.

خلونا نعرفكم أكتر على تفاصيل تجربتنا مع المطعم وأكله وشخصية تشارلي الجميلة.

مطعم تشارلي شابلن موجود في الرحاب، وبالتحديد في منطقة المطاعم. المطعم بيتميز بديكوراته الجميلة، ومجسم قبعة “تشارلي” الشهيرة، ده غير صوره المنتشرة في المكان.

هيقابلك علي الباب ممثل موهوب بيؤدي شخصية “تشارلي”، والحقيقة الشكل والمكياج واللبس معمولين بمنتهى الاتقان.

 

 

 

 

 

View this post on Instagram

 

 

 

 

 

 

 

 

 

 

 

A post shared by Rana Charaf (@rana_charaf_)

الديكورات في المكان حلوة واللون الأبيض والأسود هو المسيطر. لوهلة حسينا إننا معزومين بجد على أكلة حلوة في بيت “تشارلي”.

أكل بطعم الفن

نيجي بقي للأطباق؛ جربنا من هناك  شوربة كريمة بالفراخ كنت حلوة بس الكريمة كنت خفيفة شوية، ودي سعرها 75 جنيه.

تاني طبق جربناه كان باستا ستيك مكرونة باللحمة والصوص البني، كان حلو جدًا والكمية كبيرة والصوص مديها طعم في حتة تانية خالص، ودي سعرها 185 جنيه.

جربنا  كمان الشيش طاووق وكان مميز، والخضار اللي معاه فريش وسخن، وده سعره 220 جنيه.

أما الحلو اللي اخترناه فكان عصير سموزي مكس بيري، وبجد كان منعش وجميل، وسعره 64 جنيه.

التجربة في المجمل كانت جميلة وأكيد هنكرر زيارتنا للمكان تاني.