The Definitive Guide to Living in the Capital , Cairo , Egypt

مافيش شك إن بوتشرز برجر قام بدور بابا نويل نشر البهجة ببرجره اللذيذ عن طريق خمس فروع متوزعين في أهم مناطق القاهرة، بس من رأينا إن الأخت الصغيرة للمكان وهي “تشيكن أند ريبس” جوهرة مدفونة تستحق نفس الاهتمام.

تشيكن أند ريبس بيشترك في المكان مع فرع بوتشرز برجر في ويست تاون هب. فكرة ديكور المكان اللي بهويتين مختلفتين عجبتنا جدًا، يعني لون بوتشرز الأحمر الدموي مع السلاسل المتعلقة في الحيطة وحيطان الطوب الأحمر والساطور العملاق الشهير بيه بوتشرز برجر، وقصاد كده هتلاقي كتكوت أصفر جميل وقفص العصافير الساحر المتعلق في السقف، والأرفف اللي عليها أنتيكات والحيطان الهادية المعمولة بطوب رمادي. وعلشان إحنا متابعين لبرنامج جاي فييري Diners, Drive-ins and Dives، كنا عارفين الأكل هيطلع عامل إزاي.

بعد جولة في المنيو الكبيرة اللي تفتح النفس، قررنا نبدأ بطبق مقبلات باربيكيو ريبس ناتشو (54 جنيه). قطع الناتشو كان عليها قطع ريش مشوية وجبنة شيدر سايحة وهالبينو، ومعاهم بيكو دي جالو وخس وساور كريم. صحيح طعم الطبق كان روعة زي ما توقعنا، لكن أكتر حاجة عجبتنا كانت طعم الريش الرهيب اللي عمل نقلة نوعية للطبق.

بعدها طلعنا طلعة على الأطباق الرئيسية وبدأنا بوجبة تشيكن أند وافل (59 جنيه) مع طبق ماك أند تشيز (39 جنيه). الطبق بيتكون من قطعة وافل تحفة متقطعة أربعة مثلثات مقرمشة من بره وطرية خفيفة من جوه، بس مفاجأة الطبق الحقيقية كانت قطعتين الفراخ المقلية الطريين جدًا من جوه ومقرمشين من بره بلونهم الذهبي اللي يفتح النفس، ومع التتبيلة اللذيذة نقدر نقول أنهم يقدروا ينافسوا دجاج كنتاكي بقوة.

لو عمرك ما جربت الكوكتيل الأمريكاني المبتكر ده قبل كده نحب نقول لك إن فايتك كتير، خصوصًا لما تزود عليه طعم صوص maple syrup المسكر اللي بيتقدم في كاس صغير. قبل ما ننسى لازم نتكلم طبعًا عن الكول سلو بالبيكو دي جالو اللذيذة اللي قربت الطبق من القمة، بس العيب الوحيد في الموضوع أنهم ماقدموش ذرة زي ما مكتوب في المنيو. 

من أحلى الأكلات عند بوتشرز برجر الماك أند تشيز، ويومها كان معمول كويس بصوص الكريمة اللذيذ بس الجبنة كانت قليلة جدًا.

جربنا كمان البيف ريبس (149 جنيه) اللي بتستوي على نار هادية جدًا جدًا لمدة عشر ساعات، وبصراحة الريش كانت طرية جدًا ومن قطعية ممتازة. لو هنتكلم عن الطعم فنكهة الشوي المميزة كانت كافية ومش محتاجين حتى صوص الباربيكيو اللي بينزل مع الأكل. أما الأطباق الجانبية فكانت أرز أحمر ودي النقطة السلبية في الطبق بطعمه المتواضع، لكن البطاطس المهروسة عوضتنا بطعمها اللذيذ والمرقة الهايلة اللي عليها.

خلصت أكلتنا مع تشوروز (29 جنيه) ودول عشر قطع تشوروز مافيهومش ريحة الزيت ملفوفين في سكر قرفة ومعاهم صوص شوكولاتة. الحقيقة طعمهم كان روعة وصوص الشوكولاتة كان ماسك نفسه وعمل شغل مع قطع التشوروز. الملاحظة الوحيدة إننا كان نفسنا يكونوا أكبر من كده شوية.

واضح إن تشيكن أند ريبس ماشيين بنفس فكر بوتشرز برجر إنهم يعملوا أكلات محبوبة بس بطريقتهم الخاصة. مافيش عندنا أي شك إن تشيكن أند ريبس بالمنيو المتنوعة والأجواء الجميلة والخدمة الممتازة أكيد هيفتحوا فروع أكتر في القاهرة في أقرب وقت.