The Definitive Guide to Living in the Capital , Cairo , Egypt

رنا شرف

الشيخ زايد أصبحت عاصمة للأكل المميز في القاهرة، عدد مهول من المطاعم، ولما كنا بنتمشى في منطقة “ووك أوف كايرو”، بنستمتع بأجواء الكريسماس الجميلة، لفت نظرنا مطعم توباز، فقررنا نجرب الأكل فيه.

تعالوا نتعرف أكتر على تجرتنا في توباز!

المكان كان زحمة جدًا، ويمكن ده لأننا كنا في ويك إند، فطبيعي يكون زحمة، لكن اللي عجبنا إنه رغم الزحمة الخدمة كنت سريعة، والفريق كان متعاون جدًا.

عجبنا كمان إن المكان شيك، والترابيزات والكراسي مريحة. بشكل عام المطعم غالب عليه الطابع العائلي، يعني بنرشح المكان كخروجة عائلية حلوة.

 نيجي بقي للأكل؛ طلبنا شوربة مشروم بالكريمة، ودي سعرها 66 جنيه، كانت حلوة، بس الكريمة كان مممكن تكون أكتر علشان الطعم يكون أحلى.

طلبنا كمان مكرونة بالكفتة، الحقيقة إنها كانت حلوة ومعمولة صح، والكفتة جميلة، والصوص مظبوط ومعمول بمزاج، تتبيلة الكفتة كانت ممتازة، والطبق ده سعره 134 جنيه.

كمان طلبنا موكا كوفي بعد الأكل، كان حلو، بس جه بارد شوية، وطلبنا إنه يتسخن، وكان سعره 97 جنيه.

بصفة عامة نقدر نقول وإحنا مطمئنين إن المكان حلو ويستحق التجربة، والأسعار معقولة، لكن بننصحكم تبعدوا عن زيارته في الويك إند علشان الزحمة!