The Definitive Guide to Living in the Capital , Cairo , Egypt

مطاعم
جابرييل – Gabriel

جابرييل: فرع المطعم الإيطالي الجديد في هليوبوليس ومستوى متوسط

تم التقييم بواسطة
Hend Salah
قيم
قيم الآن
جابرييل: فرع المطعم الإيطالي الجديد في هليوبوليس ومستوى متوسط

جابرييل اشتهر بأنه المطعم اللي اتصور فيه مسلسل عايزة أتجوز، وطبعًا كان متوقع من المطعم الإيطالي الفخم يقدم حاجة جديدة ومبهرة. لكن زيارتنا لفرعهم الثاني في هليوبوليس وتحديدًا شارع النزهة ماكانتش واضحة المعالم.

منطقة الآوت دور الواسعة بتتكون من كراسي وكنب مريحين (وهو نفس اللي هتلاقيه في المطعم الشرقي "ورق عنب" الموجود داخل فرع جابرييل في المهندسين) ومعاها المطعم نفسه المكون من دورين باللونين الأسود والذهبي المميزين للفرع القديم، والأكيد أن فرع جابرييل النزهة ملفت للانتباه.

ندخل على منيو جابرييل اللي بتقدم أكلات متنوعة من أصناف شوربة وباستا وستيك وبيتزا وساندويتشات. قررنا ندخل في المفيد على الطول وبلاش مقبلات، وطلبنا ريجاتوني شريمب باستا (57.90 جنيه) وطبق فراخ مشوية بالكاري صوص (69.90 جنيه) اللي بتختار معاه صنفين من بين خضار سوتيه وبطاطس محمرة وباستا وأرز.

بعد ثلث ساعة وصل الأكل سخن ويفتح النفس. نبدأ مع طبق الفراخ المكون من ثلاث قطع صدور فراخ مشوية طرية وتتبيلتها روعة وغرقانة صوص كاري لذيذ وقوامه ممتاز. المشكلة الوحيدة في الطبق الممتاز إن الخضار السوتيه والأرز ماكانوش مستويين كويس.

ننسى الفراخ شوية ونروح على الشريمب ريجاتوني باستا المليانة جمبري وحلقات كاليماري مقلية مقرمشة، ومتغطية بصلصة حمراء رائعة مع شوية ثوم وريحان وجبنة بارميزان أضافوا نكهة ممتازة للأكل.

بعدها كان لازم حاجة حلوة تغير طعم الأكل، بس للأسف يوم زيارتنا ماكانش فيه غير براوني شوكولاتة، وكمان الجرسون احتاج 10 دقائق علشان يتأكد إنها موجودة أصلًا.

يعني مش كفاية إنها الحاجة الوحيدة الموجودة، لا وكمان وصلت باردة ومالهاش طعم ومافيش عليها صوص شوكولاتة أصلًا. يمكن الجانب الإيجابي الوحيد في الطبق كان بولة الآيس كريم فانيليا الكبيرة اللي على الكيكة، واللي برضه ماكانش عليها صوص!

كان لازم نحبس الأكل بشيشة مانجو – كيوي (40 جنيه) وبصراحة كان اختيار هايل. المشكلة إن عامل الشيشة ماكانش مهتم بتغيير الولعة والنتيجة كانت إن الحجر اتحرق، وبعد وقت بسيط كانت نكهتها راحت.

كنا متوقعين أداء أحسن من جابرييل، ويمكن عندهم بعض الأطباق معمولة كويس، لكن يوم زيارتنا السلبيات كانت أكثر من الإيجابيات.

نصيحة 360

خلي معاك كاش أحسن علشان يومها ماكانش متاح الدفع ببطاقة الائتمان.

أحسن حاجة

الأطباق الرئيسية كانت لذيذة.

أسوأ حاجة

الخدمة بطيئة والبراوني كانت بشعة والشيشة محتاجة اهتمام.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح