The Definitive Guide to Living in the Capital , Cairo , Egypt

مطاعم
جرينجوز بوريتو جريل – Gringos Burrito Grill

جرينجوز بوريتو جريل: المطعم المكسيكي لتوصيل الطلبات فقط وصل الزمالك والمهندسين

  • توصيل طلبات فقط لمنطقة المهندسين والزمالك
  • مكسيكي
تم التقييم بواسطة
Dina Mokhtar
قيم
قيم الآن
جرينجوز بوريتو جريل: المطعم المكسيكي لتوصيل الطلبات فقط وصل الزمالك والمهندسين

أي حد من أهل المعادي، ومن محبي المعادي لازم يبقى عارف مطعم جرينجوز بوريتو جريل – Gringos Burrito Grill المكسيكي، إحنا شخصيًا كنا بـ نسمع عنه بقى لنا زمن، وبالتالي لما عرفنا أنه فتح فرع جديد للتوصيل فقط في منطقة الزمالك والمهندسين قررنا أننا لازم نجربه.

بما أن البوريتو من أشهر الأكلات المكسيكية، قررنا أننا نطلب كلاسيك بوريتو بشرائح الستيك (55 جنيه)، والفراخ المشوية (45 جنيه). وكطبق جانبي قررنا نأخذ ناتشوز بالجبنة (19 جنيه)، وللتحلية طلبنا إمبنادا بالنوتيلا (22 جنيه).

بدون تأخير كان الأوردر عندنا؛ التغليف شكله يفتح النفس، والأكل سخن. أول حاجة ذقناها كانت الناتشوز بالجبنة، وهي عبارة عن رقائق ذرة مقرمشة عليها صوص جبنة ذايبة ومكعبات فلفل وطماطم وبصل مبهرين (اللي هي مكونات سلاطة بيكو دي جالو). بالرغم من أن الطبق ككل كان شهي، إلا أنه بالنسبة لنا كان أفضل لو أن الصوص كان منفصل عن الناتشوز، لأن عقبال ما الطلب وصلنا كانت قطع الناتشوز تشربت الصوص بغزارة وبالتالي عدد كبير منهم ما بقاش مقرمش.

لكل اللي ما يعرفش إيه هو البوريتو، البوريتو عبارة عن عيش تورتيا ملفوف على مجموعة من المكونات زي: الأرز، الجبنة المبشورة، فاصوليا سوداء مع سلاطة بيكو دي جالو وكريمة حامضة، بوريتو الستيك المشوي كانت دون المستوى تمامًا نتيجة لأن شرائح اللحم ما تعدتش ثلاث قطع بالعدد، ده غير أنها كانت غير قابلة للمضغ، واللي ما عوضش عن ردائتها طراوة المكونات الثانية، ولكن بوريتو شرائح الفراخ المشوية بالنسبة لنا كان أحسن تعويض عن اللي شفناه في البوريتو الأول؛ الفراخ كانت موجودة بوفرة، ده غير أنها كانت مليئة بالعصارة، بقية المكونات عامة متناغمة وطعمها أكثر من رائع وتتبيلتها مختلفة عن أي بوريتو ذقناه في أي مكان ثاني.

إمبنادا النوتيلا -واللي عبارة عن فطيرة نوتيلا مقلية مكونة من عجين هش ملفوف على شكل يشبه القطايف ولكن بحجم أكبر- فكانت أحسن نهاية للتجربة، فحجمها كافي جدًا لشخص واحد بعد البوريتو. العجينة الخارجية كانت مقرمشة وذهبية، أما حشوة النوتيلا فكانت وفيرة، عجبنا في الإمبنادا أن النوتيلا ما تأثرش قوامها أو طعمها بعملية القلي.

 بالرغم من أن تجربتنا مع بوريتو الستيك كانت مؤسفة، إلا أن بقية طلباتنا كانت جيدة، وبالنسبة للناتشوز، هـ نبقى نطلب الصوص لوحده المرة الجاية.

نصيحة 360

زوروا صفحة جرينجوز بوريتو جريل على الفيسبوك.

أحسن حاجة

بوريتو الفراخ المشوية.

أسوأ حاجة

بوريتو الستيك.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح