The Definitive Guide to Living in the Capital , Cairo , Egypt

أكثر مكان مخنا بيعجز عن التفكير “هناكل إيه” لما بنروحه هو الجيزة، مساحة كبيرة وزحمة ومحلات الأكل الكويس مش جنب بعضها، سواء ماشي على رجلك أو راكب، في الحالتين معاناة، وهتتبهدل علشان توصل من الزحمة المسافات الغريبة بين الأماكن.

أكتر حاجة مميزة نعرفها في الجيزة هي الحوراني، لكن اللي زهقان من السمك ومزنوق في عزومة حلوة تشرفه في محيط الجيزة يعمل إيه؟ سمعنا عن جمال شلقامي، الراجل اللي كان عنده عربية صغيرة مشهورة بتبيع ورقة لحمة بطعم خرافي في شارع البحر الأعظم، واللي من كتر زبائنه وشهرته ربنا فتحها عليه وفتح محل ضخم من دورين في شارع المحطة.

قلنا نجربه مافيهاش حاجة، خاصة أن سمعته زي الطبل، وممكن ببساطة تسأل عنه وأنت في أول شارع البحر الأعظم فيدلوك عليه بمنتهى الحماس والثقة، روحنا هناك والبداية كانت موفقة جدًا من عمال المحل اللي قادرين يتعاملوا في نطاق الشارع الضيق، مش بيخلوك تشيل هم الركنة، بيساعدوك ولو لعربية محتاجة تتنقل وأنت بتاكل مش بيوجعوا دماغك وبيتصرفوا ودي أنت أول نقطة إيجابية.

تاني ملاحظة هي المساحة الكبيرة للمحل على دورين، اختارنا الدور العلوي، وقعدنا وفي دقايق جاء لنا شاب صغير يشوفنا عاوزين إيه، طلبنا السلاطات في البداية، ماكنش فيهم بابا غنوج، سألنا عنه الشاب اللي بيقدم فاعتذر لنا وقال أنه لسه ماجهزش، وقال لنا مجرد ما يجهز هيجيبه.

الضغط اللي حولينا وبساطة الطلب إننا عاوزين نبدل سلاطة بسلاطة تانية خلانا نتخيل أنه هينسى، لكن في المقابل ده ماحصلش، بالعكس، بعد أكثر من نص ساعة ورغم إننا كنا قربنا نخلص أكل مجرد ما جهزة جاء لنا على طول وبدون حساب زيادة ودي نقطة تانية مميزة هناك.

عند شلقامي هتقوم شبعان والأكل مش هتعرف تطلع فيه غلطات، وإن كان مش أعظم حاجة لكن يكفي النضافة والطعم المعقول والكميات كمان.

طلبنا كفتة وطرب وفراخ مشوية ورز، الكفتة عادي يعني مش اللي تروح لها مخصوص، لكن مش وحشة، والطرب نفس الشيء، الفراخ المشوية برضه عادية يعني لو هياخد درجة في الأكل هندي له 7 من عشرة اللي هو ناجح لكن مش ممتاز.

في ظل كل الأخبار الوحشة والتجارب السيئة اللي حولنا نقدر نقول أنه توافر النظافة مع الخدمة الكويسة مع الطعم المعقول مع السعر كمان فده يعتبر نجاح مش كتير بيعرفوا يحافظوا عليه.

كيلو الطرب عند شلقامي بـ 150 جنيه بعد زيادة الأسعار، والفرخة المشوية بـ 60، النيفة بـ 180/ والحمامة المحشية بـ 35 وعنده سجق ضاني الكيلو بـ 200 جنيه، بس زعلنا إننا مافتكرناش نجرب ورقة اللحمة عنده لذلك قررنا نطلبها الزيارة الجاية.

ملحوظة: من الممكن أن الأسعار تكون زادت في الفترة الأخيرة شوية.