The Definitive Guide to Living in the Capital , Cairo , Egypt

ماحدش يقدر يقاوم الأكلات المحلية المصرية! لأن الطعم المصري معروف بجماله، وعلشان كده اخترنا نجرب حاجة جديدة. روحنا مؤخرًا Takosan المعادي، ورغم أنهم لهم أكتر من فرع في القاهرة إلا أننا كنا محتاجين نجرب الطعم والخدمة في أجواء المعادي المميزة. هنحكي لكم التفاصيل في السطور الجاية.

المطعم موجود في مكان اسمه كيتشينكو وهو مجمع مطاعم وكافيهات كبير مستخبي في دجلة المعادي، ورغم أن عدد الترابيزات عندهم قليل إلا أن الانتظار وقته مناسب بعيدًا عن الويك إند، ومش هتملوا من الانتظار لأن الأجواء لطيفة وخفيفة وهتحسوا أنكم وسط كومينتي أسري مش مجرد مكان بيقدم خدمات وبس.

طلبنا من خلال الموقع الإلكتروني لكيتشينكو اللي بيحدد لكم المطاعم اللي موجودة وبعد ما تختاروا المطعم المناسب بتختاروا محتاجين الأوردر تيك أواي ولا توصيل ولا في المكان، والدفع متاح كمان عندهم من خلال البطاقات البنكية على الموقع أو من خلال الكاش وماكينات الدفع عند الكاشير، وإحنا اخترنا نطلب من Takosan واللي هو كان هدفنا اللي رايحين له.

طلبنا من عندهم طبق جمبري ديناميت وكان سعره 170 جنيه، وهو كان عبارة عن جمبري مقرمش متغرق صوص سويت آند ساور مع مايونيز وسط شوية خضرة، والطعم كان حلو ومميز، والكمية كانت مناسبة بالنسبة للسعر، ورغم انه كان مش سخن وتقريبًا ده علشان برودة الجو إلا أن طعمه كان لسه طازة، وبالتأكيد لو كان سخن طعمه كان هيختلف ويبقى مميز أكثر.

كمان طلبنا من عندهم بطاطس حلوة وكان سعرها 55 جنيه، ورغم انها كانت مسكرة بزيادة بس طعمها كان بيشد وخاصة لمحبي الحاجات الحلوة، وننصحكم تجربوها وهي سخنة علشان هتفرق كتير معاكم.

تجربتنا في المكان كانت مميزة وعجبتنا، وبنرشح لكم المكان بشكل عام وTakosan بشكل خاص علشان تجربوهم.

العنوان: شارع 206 – دجلة المعادي.

وتقدروا تتعرفوا أكتر عن فروعهم من خلال حساب إنستجرام من هنا.