The Definitive Guide to Living in the Capital , Cairo , Egypt

في أهدأ وأرقى وأغلى بقعة في مدينة نصر وبالتحديد في منتصف شارع أبو داوود الظاهري موجود محل له باع في عالم الأسماك والمأكولات البحرية هو «جندوفلي»، كان لنا زيارة في كايرو 360 قبل كده من 3 سنين لفرع المعادي، وبعد الفترة دي قررنا نجرب فرع مدينة نصر اللي مش بـ يختلف كثير عن فرع المعادي الأنيق وإن كان الفرع هنا أقل في كل شيء، زيارتنا اللي استمرت قرابة الساعة ما كنتش شيقة زي ما كنا متوقعين، وكان عندنا عدد من التحفظات بخصوص الخدمة ومستوى الطعام.

المكان من الداخل صغير بالمقارنة باللي تعودنا عليه في مطاعم السمك المعروفة اللي مساحتها بـ تبقى كبيرة بشكل مبالغ فيه، هنا الوضع مختلف والمحل مكون من طابقين الأرضي هو الأكبر وفيه حوالي 6 ترابيزات والدور العلوي “المغري أكثر للجلوس” كان خارج الخدمة وقت زيارتنا علشان الـ Staff كان مش كفاية على حد قول الجرسون اللي استقبلنا، فأخذنا مكاننا جنب أحد الشبابيك المطلة على الشارع الهادئ، وبدأنا نتأمل ديكور المكان اللي مش واضح معالمه من كثر زينة وإضاءات الكريسماس والعام الجديد اللي لسه موجودة في أركان المحل، ومع ذلك قدرنا نشوف أن الديكور بسيط بألوان خشبية هادئة وشاشات تليفزيون على الجدران بـ تعرض أفلام أجنبية بدون صوت والترابيزات لحسن الحظ مش عليها المشمع الكئيب الموجود في معظم مطاعم الأسماك، ودي كانت بادرة تفاؤل بالنسبة لنا أن فيه هنا حاجة مختلفة.

ثلاجة عرض فيها كمية محدودة جدًا من الأسماك والجمبري، ما عجبناش فيها إلا سمك موسى (الكيلو 125 جنيه) بلونه الغامق من الخارج ولحمه الأبيض النقي من الداخل، ورجعنا لترابيزتنا نتفرج على المنيو اللي هو بالضبط أي منيو مطعم أسماك حتى بجملة “سعر الجمبري حسب اليوم” اللي بـ تخلينا نسأل شفويًا عن سعر كل جمبري حسب حجمه. شوربة السي فوود هي البداية الطبيعية في مطعم السمك، طلبناها مخلية (29 جنيه) وقُدمت لنا فريش بعد ما جاء الجرسون وغرفها أمامنا في الطبق من إناء معدني كبير كان في يديه، وكانت لذيذة وعامرة بالجمبري والكابوريا، لكن شوربتها كانت خفيفة مش كريمية وسميكة زي ما بـ نحبها. طلبنا طبق مشويات مشكلة (54 جنيه) فيه سمك فيليه ووحدات جمبري صغيرة وأصابع كاليماري وجندوفلي لذيذ ونظيف تمامًا تقززه زي اللب، وكفتة سمك ومعاه أرز بالجمبري، السمك فيه هو أحلى حاجة والكفتة فكرتنا بالطعمية الباردة بلونها الأخضر وطعمها الكاوتشوكي، لكن مع سلاطة الطحينة والطماطم (6 جنيه) وسلاطة الرنجة بالفلفل الملون (7 جنيه) كل حاجة ممكن تتاكل، خاصة مع المستوى المتميز للسلاطات عند «جندوفلي». طلبنا جمبري بالحجم الكبير (الكيلو 160 جنيه) معمول بطريقة الصينية بقشره مع صلصة الطماطم والفلفل الأخضر ودي كانت أحلى حاجة تتحط على ترابيزتنا اليوم ده، وممكن بعد ما تخلص الجمبري الفريش تحط الصوص بتاعه على الأرز أو تأكله بالعيش لحد ما تخلص الصينية المعدنية العملاقة اللي بـ يُقدم فيها. وما نسيناش نطلب سمكة موسى واحدة صغيرة أقل من ربع كيلو ونأكلها مقلية على سبيل التجربة بعد ما عجبنا شكلها في العرض وفعلًا كانت ألذ من أي نوع سمك ثاني ممكن نأكله وعرفنا أن الغالي ثمنه فيه وعرفنا ليه أكيلة السمك دائمًا بـ يحكوا ويتحاكوا عن سمك موسى الخطير.