The Definitive Guide to Living in the Capital , Cairo , Egypt

بصفتنا من عشاق السمك فماكنش ينفع ما نروحش مطعم حسني في المهندسين، واللي موجود في موقع مميز في شارع محي الدين أبو العز، والمطعم نفسه عبارة عن دورين، والمساحة ضخمة جدًا وده يخليه اختيار مناسب جدًا للعزومات.

 المطعم بيتميز بإضاءة قوية جدًا، وصالة الطعام كبيرة بديكورات كلاسيكية وكراسي وترابيزات مريحة، والموظفين في المطعم لابسين ملابس موحدة بتميز المكان.

المكان بيتميز كمان بوجود عدد من الترابيزات بتطل على الشارع، قعدتهم حلوة ومريحة، والمسافات معقولة بين الترابيزات وبعضها، وده بيدي للمكان قدر من الخصوصية.

الدور الأرضي مخصص للتيك أواى والمطبخ وفيه ثلاجة لعرض الأسماك، ودي فيها أنواع كتير زى البلطى والبورى والسبيط والجمبرى وغيرها من الأنواع.

المطعم فيه منيو للمشويات ومنيو للأسماك، فقررنا نجرب منيو الأسماك بعد ما أعجبنا بطريقة عرضها فى الثلاجة، بدأنا بشوربة السي فوود فكانت هايلة، (سعرها 50 جنيه) لكن عيبها الوحيد إن الكمية قليلة جدًا بعكس الكميات اللي بتتقدم في المطاعم التانية، لكن المحتوى نفسه كان غني.

نيجى بقي للسلاطات اللي بجد أكتر حاجة بتميز مطعم حسني، بينزل مع كل أوردر مجموعة متنوعة من السلاطات زى سلاطة الطحينة وسلطة بابا غنوج وسلطة الرنجة وسلاطة البنجر وسلاطة الجبنة القديمة وسلاطة البسلة والبطاطس، حقيقي تشكيلة مبهرة جدًا خلت شكل الترابيزة يفتح النفس بجد.

بعدها طلبنا سمك بوري، وبعد ما الموظف خيرنا مابين المشوي بالردة أوالمشوي بالزيت والليمون قررنا نختار النوع الثاني (سعره 82 جنيه)، والحقيقة عجبنا جدًا طعم السمك، التتبيلة كانت مميزة.

طلبنا كمان ربع كيلو جمبري مشوى (سعره 100جنيه) وده نقدر نقول عليه شهر الحقيقة، لأنه كان نازل سخن ملهلب، وحجم الجمبري نفسه كبير وطعمه رائع جدًا، نزل معاه سبيط مقلي قطع صغيرة، وكان سخن وطعمه مميز وجودته عالية جدًا.

الخدمة في المطعم جيدة جدًا والأكل جالنا بسرعة تقريبًا بعد سبع دقايق من طلبه ودي حاجة عجبتنا جدًا، لأنه في الغالب الأكل بيتأخر في مطاعم الأسماك.

كان عندنا تحفظ على نظافة الحمامات، وكنا نتمنى تكون أفضل من كده، ومش عارفين الأمر كده على طول ولا الموقف ده كان في اليوم ده بس، استغربنا كمان عدم وجود مناديل في المكان.