The Definitive Guide to Living in the Capital , Cairo , Egypt

مطاعم
حواوشي الربيع

حواوشي الربيع الأصلي.. مطعم جديد في القاهرة بينافس البرنس وصبحي كابر

إمبابة حواوشي حواوشي الربيع الأصلي حواوشي بالسجق حواوشي سادة سجق جريل مطاعم شعبية مكرونة ملوخية
  • محمد الإمبابي، مدينة التحرير، إمبابة
تم التقييم بواسطة
Mohamed Talaat
قيم
قيم الآن
حواوشي الربيع الأصلي.. مطعم جديد في القاهرة بينافس البرنس وصبحي كابر

قررنا في كايرو 360 نجرب مطعم “حواوشي الربيع الأصلي”، اللي بدأ يحقق شهرة معقولة، وبيحاول ينافس صبحي كابر والبرنس، ومكانه قريب منهم، شارع إمبابي، تحت كوبري الساحل خلف مستشفى حميات إمبابة.

الأول حاولنا نتواصل مع المحل عن طريق التليفون قبل ما نروح بيوم، ولكن للأسف الرقم الوحيد اللي موجود ماكنش بيرد، وقررنا نكمل ونروح على طول، بس كان فيه تحذير إننا لازم نروح قبل الإفطار بساعتين علشان نلاقي مكان، واحنا بننصحكم تروحوا قبلها فعلًا بس ممكن بساعة، ولو أنتم مجموعة مكونة من 6 لـ 12 فرد ممكن تروحوا قبلها بيوم مثلًا وتحجزوا “الروف”.

المنيو بتاع حواوشي الربيع صغير وخفيف مش معقد. لكن اكتشفنا إن فيه أطباق مش موجودة في المنيو، زي ورقة اللحمة اللي ماعرفناش نطلبها للأسف. وده شئ لو تعلمون يحزن. لكن جربنا حاجات كتير جدًا علشان ننقل لكم الصورة كاملة. أولها “الحواوشي” وكان الرغيف السادة منه متوسط الطعم وسعره 20 جنيه. ومحتاج خبرة أكتر وتتبيلة متميزة، علشان يقدر ينافس الرفاعي ملك الحواوشي في مصر. أما الحواوشي بالسجق واللي سعره 25 جنيه، كان متميز. وتتبيلة السجق مع خلطة الحواوشي كان متخدم عليها أحسن من السادة، علشان كده عجبنا جدًا.

جربنا كمان المكرونة السادة، والمكرونة بالسجق بـ 30 جنيه، والمكرونة باللحمة المفرومة بـ 20 جنيه. لكن للأسف ماكنتش حلوة بالنسبة لنا، ومن أول ما نزلت وإحنا مش عاجبنا شكلها. لأن واضح إنها اتعملت من بدري وتحسها مكلكعة في نفسها، وننصحكم بلاش منها لحين تحسين مستواها.

أما الملوخية فكانت عادية مانقدرش نقول حلوة ولا كانت سيئة، لكن بالتأكيد مش هي أحسن ملوخية كلناها في حياتنا.

ندخل بقى على لحم الإستيك اللي “دوبنا في هواه” ونفسنا كان مايخلصش، كان متبل صح لازيادة ولا نقصان. كان سلس في الأكل واللحمة بلدي، وطرية ومتماسكة في نفسها ومالية مركزها. وكان نفسنا تكون سخنة بس رمضان كريم والأكل برد لحد ما المغرب أذن. وكمان الكبدة البلدي كانت حلوة قوي، ومافيش عليها غبار. بس ممكن تبقى حراقة شوية علشان تظبط الآداء مع الأكيلة اللي زينا.

كمان جربنا السجق الجريل، وده عالم تاني بتتبيلته من البصل والخضرة الخفيفة والطماطم والبهارات، اللي كان واضح إنها متظبطة بمعلمة. وطعم اللحمة اللي حقيقي يبهر ويحسسك إنك بتاكل سجق من العيار الثقيل.

نحب نوضح أن حواوشي الربيع أكله بلدي، وبيتعمل قدامك وبتقعد في الشارع. والمعاملة كويسة جدًا. وكمان عندهم خدمة التوصيل من خلال الرقم 01007273769 وممكن تتابع معاهم على صفحتهم على الفيس بوك من هنا.

 

نصيحة 360

حاول تروح قبل الفطار بساعة على الأقل

أحسن حاجة

لحم الإستيك

أسوأ حاجة

المكرونة بأنواعها

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح