The Definitive Guide to Living in the Capital , Cairo , Egypt

أكل الحواوشي من أجمل الأكلات اللي بتسبب لنا السعادة، لأنها من الاكلات اللي بتمزج الدماغ وتدلع المعدة رغم أنها أكيد بتنفخ “الكرش”، بس كله يهون في سبيل رفع هرمون السعادة، وعلشان الحواوشي مش أي حد بيعمله حلو قررنا إننا نروح حواوشي الرفاعي، لأنه من أقدم المطاعم اللي بتقدم حواوشي وأهمها.. لكن للأسف المرة دي تجربتنا مع الحواوشي ماكنتش أفضل حاجة لأنه كان حواوشي متقدم بشكل مختلف.

هنقولكم على تجربتنا مع حواوشي الرفاعي وافتكاساته الجديدة.

تجربتنا كانت في الفرع الأصلي له في عابدين، وطبعًا في الصالة المكيفة، ولسه زي ما هو بعشوائية التعامل وشعبية الخدمة واللي أكيد كتير بيحبوها زي ما هي كدة، ولكن اللي معجبناش الويتر اللي ندهنا عليه مرتين علشان ياخد الاوردر وهو مش عاوز يسيب صديقه اللي بيتناقش معاه في موضوع ما، وكمان لما الأوردر جه طريقة التقديم مكنتش لطيفة.

وبدأنا الطلب بتاعنا بطبق طحينة سعره 7 جنيه، وكانت حلوة وأكلناها بالشوكة قبل ما الحواوشي ينزل، وكمان طبق مخلل بسعر 7 جنيه وبرضه خلصناه بسرعة بس أكيد علشان كنا جعانين، وكمان طلبنا ربع ممبار بـ30 جنيه، ومن كل قلبنا بنطلب منهم يبطلوا يعملوه لأن الأرز ماكنش أحسن حاجة والطعم ماكنش لطيف، وده بناءً على أكتر من مرة تجربة.

ودخلنا بقى على ليفل الوحش واللي مكناش فاكرينه هيكون كده وطلبنا حواوشي “الإنتركوت”، وسعره 67 جنيه وهو كان عبارة عن لحمة متبلة، وشرائح إنتركوت، وخضروات وجبنة شيدر، وإحنا كان طلبنا فيه جبنه موتزاريلا، وطعمه كان لطيف وحجمه كبير، وكمان من ضمن طلباتنا كان حواوشي “الكبير قوي” واللي كان سعره 70 جنيه، وهو فعلًا كبير وفيه إنتركوت وبيف بيكون وجبنه، وهو كان تقيل قوي وطعمه متوسط، والغريب أن سعره في المنيو 67 جنيه، ولكن في الشيك 70 جنيه، وده خطأ لازم يصلحوه.

رحنا بقى بعدها على رغيف حواوشي “صاحبة السعادة”، واللي كان سعره 67 جنيه، ومكوناتهم “لحمة متبلة – تركي مدخن – إنتركوت – خضروات – وجبنة شيدر”، وهو أتقل رغيف حواوشي ممكن تاكله. لكن للأسف إحنا ماحبيناش المنتج، لأنه بوظ طبيعة الحواوشي المصري اللي متعودين عليه.

مش دائمًا الافتكاسات بتكون حلوة، والطعم الأصلي دائمًا هو اللي بيكسب، ولازم الرفاعي يعرف إن تغيير هوية الحواوشي ممكن ماتكونش أفضل فكرة يطبقوها.

تجربتنا كانت كويسة وشبعنا وبطننا اتنفخت من الأكل والأسعار مش غالية ونتمنى أنهم ينسوا الافتكاسات ويرجعوا زي زمان، ومننساش نطلب منهم يبطلوا يعملوا ممبار لإنه مش منطقتهم خالص!

تقدروا تطلبوا منهم دليفري من خلال رقمهم 15017.

ولو حابين تعرفوا أكتر عنهم وعن فروعهم زوروا صفحتهم على فيسبوك من هنا.