The Definitive Guide to Living in the Capital , Cairo , Egypt

مطاعم
داديز برجر- Daddy’s Burger

داديز برجر: برجر بإضافات جديدة طعمها حكاية في الشيخ زايد

أحلى برجر الجيزة الشيخ زايد برجر برطمان جبنة داديز برجر طعم حكاية مطاعم
تم التقييم بواسطة
Angie El Batrawy
قيم
قيم الآن
داديز برجر: برجر بإضافات جديدة طعمها حكاية في الشيخ زايد

إحنا بنقدس ونحترم الأماكن أو الأشخاص اللي بيتقنوا مهنتهم أو حرفتهم، وفوق ده بيطوروا فيها ويخلوها مختلفة عن الموجود على الساحة، ويا سلام بقى لو الموضوع مرتبط بالأكل، مهنة “مطور الوصفات” دي ما جاتش من فراغ، مهنة مهمة بتخلينا ندخل عالم جديد من المذاقات والنكهات بعيد عن المألوف، وده خلى معيار تقييمنا للمطاعم مش الطعم الحلو بس لكن كمان المكونات الجديدة وغير المألوفة. 

إحنا بنعترف أن بطننا ساعات هي اللي بتوجهنا للمطاعم الجديدة علشان نجربها، بس لما عينك تعمل ميكس مع بطنك بيبقى الموضوع كبير، داديز برجر – Daddy’s Burger الموجود في ريفوليت Rivulet الشيخ زايد عرفوا يجيبوا رجلنا بفيديوهات برطمان الجبنة السايحة (Melted Cheese Jar) اللي بينزل مع الساندويتشات وشفناها في صفحتهم على الفيسبوك، كل الناس ماسكة البرطمان وعمالة تحط جبنة سايحة على الساندويتش وإحنا أعصابنا بتنهار، فقلنا ما بدهاش بقى ورحنا.

المنيو عندهم متنوعة وكبيرة، وغير البرجر عندهم نوعين ساندويتش فراخ وهوت دوج كمان، أما البرجر له 3 أحجام: 150 و200 و250 جرام، اختارنا من المنيو كذا نوع برجر نجربهم (كلهم 200 جرام) وهنقول لكم على مكوناتهم بالتفصيل، أخذنا Yummy بـ 58 جنيه، Gladiator بـ 73 جنيه، Milano بـ 63 جنيه، اكتشفنا أن مش كل الساندويتشات بينزل معاها برطمان الجبنة السايحة، أنواع معينة بس، لكن أنت ممكن تطلبه كصنف جانبي (برطمان جبنة سايحة 39 جنيه)، وكمان الساندويتشات مش بينزل معاها بطاطس (وده شيء زعلنا برضه) فطلبنا بطاطس محمرة (14 جنيه)، ومشروب غازي (12 جنيه).

الأكل بياخد نص ساعة في التحضير، يوم زيارتنا كانت الدنيا زحمة جدًا والجرسونات خلية نحل رايحين جايين، بس لو أنت جعان هتحس أن الدقيقة اللي بتعدي كأنها يوم بحاله، جاء لنا الأكل أخيرًا، أول ساندويتش هو Gladiator وده عبارة عن جريفي مشروم وجبنة سويسرية، وشيدر حمراء وصوص جرجير (أيوه أنت قريت صح) وقطع جرجير كمان ومخلل خيار وخس وبيف بيكون وصوص باربكيو وصوص داديز، فهمتوا ليه كنا بنتكلم عن التطوير في الوصفات والطعم؟ أول مرة في حياتنا نسمع عن صوص الجرجير، والحقيقة أنه طلع حلو جدًا، لازم نقول حاجة الأول أن طعم اللحمة نفسها كان عالمى، التتبيلة والتسوية وقوامه المتماسك والسُمك ممتازين (إحنا بنكره البرجر اللي بيفرفت)، وكمان كان Juicy وده المهم، كل دي عوامل أدت لنجاح أهم حاجة بيقوم عليها المكان، وبعدين يليها في الأهمية المكونات اللي عليه، الصراحة طعم البرجر كان رائع بالمكونات، اختيار وبداية موفقة.

ندخل على Milano وده مكوناته شرايح سلامي وصوابع موتزاريلا وصوص ريحان وصوص جرجير وخس وبصل مقلي وطماطم، لو أنت مش من محبي الفلفل هتضطر تنقي الفلفل من السلامي علشان تعرف تاكل، بس طعم الساندويتش برضه حلو جدًا لدرجة أننا أكلناه وبعدما ما خلصنا لاحظنا أنهم نسيوا يحطوا لنا صوابع الموتزاريلا واتضايقنا جدًا، وما كانش ينفع نطلبها بعد ما خلصنا أكل، ما نعرفش بقى ده بسبب ضغط الشغل عليهم ولا إيه، وإحنا ما لاحظناش من الأول لأن زيارتنا كانت بالليل والإضاءة خافتة شوية وكنا جعانين.

ما قبل الختام بقى ساندويتش Yummy وده اللي اختراع بجد، لو أنت بتحب الطعم المسكر لازم تجربه، مكوناته عبارة عن شرايح أناناس ومربى بلوبيري وخس وبصل مقلي وجرجير، إحنا أصلًا بنحب نعمل البرجر بالأناناس في البيت وبنحط عليه باربكيو صوص بيبقى عالمي، لكن طعم لحم البرجر مع أناناس وبلوبيري اخترااااااع، المزازة بتاعة البلوبيري مع الطعم المسكر في الأناناس مع الملح والتتبيلة الموجودة في البرجر عملوا توازن خرافي، ممكن تقول عليه لبخ لو أنت مش متعود بس على العكس الموضوع متوازن ومتكافئ جدًا.. لازم لازم تجربه.

البطاطس كانت لطيفة مافيهاش افتكاسة، برطمان الجبنة ده بقى حكاية، أولاً لازم تحط الجبنة أول ما تيجي لك علشان كل ما تقعد كل ما قوامها بيتقل وبيتماسك رغم أن الدنيا حر، وكمان كميته تكفي 4 أو 5 أشخاص، هاتوا برطمان واحد كفاية جدًا لو أنتم مجموعة.

مسك الختام بقى براونى مادنيس (47 جنيه)، الموضوع مش مجرد آيس كريم وبراوني زي اللي موجود في كل المطاعم، هو بيتقدم في برطمان مش طبق وعبارة عن كيك براوني مع أوريو وفلوتس ونوتيلا وآيس كريم فانليليا، كل ده محطوط في البرطمان طبقات مكررة فوق بعض شكلها خرافي والصوص اللي سايح على البرطمان من بره هيخليك تسيح أنت كمان، البرطمان ده ميكس عجيب، تدب المعلقة وتاكل يخبط في بُقك نوتيلا، تحط المعلقة تاني تلاقي فلوتس أو بوريو ضربوا في دماغك، وده اللي عجبنا لأن أغلب الأماكن بيحطوا طبقة واحدة (غير مكررة) من كل نوع فلما تاكل الآيس كريم اللي فوق تلاقيه خلص وتلقيك بتاكل البراونى لوحدها.. وهكذا، ده غير الميكس بين الكيك السخنة مع الآيس كريم الساقع، بس نصيحة مش هتقدر تكملها لوحدك، خلي 3 صحابك يشيروا معاك فيها، يا إما مش هتعرف تدخل من باب بيتكم.

تجربتنا في داديز برجر ما تتنسيش، ولازم هنروح تاني علشان نجرب مكونات جديدة لباقي الساندويتشات، وهنركز المرة الجاية في المكونات علشان لو نسيوا حاجة ما يفوتناش طعمها.

نصيحة 360

داديز برجر موجود كمان في القاهرة الجديدة في Patio Dinning Hub وفي مدينة نصر وراء سيتى ستارز.

أحسن حاجة

طعم لحم البرجر، وكل حاجة تخص البرجر.

أسوأ حاجة

فين صوابع الموتزاريلا؟!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح