The Definitive Guide to Living in the Capital , Cairo , Egypt

في شارع 9 الشارع الأهم والأطول في المعادي هـ تلاقي مطعم «دراجون هاوس»
قريب من «كوفي بين» في دور علوي فوق كافيه «كيوي» اللي كتبنا عنه من فترة. المطعم
له يافطة ضخمة تليق باسمه (تنين بقى) باللون الأحمر، ومدخل المحل بـ يبقى من لفة
جانبية ناحية اليمين وهـ تلاقي سهم بـ يوضحها قريب من يافطة المحل.

عالم ثاني داخل المطعم، مش هـ تفتكر أنك في شارع 9 المزدحم إلا لو قعدت جنب
الشباك وتفرجت على صورة الشارع من غير صوت. هدوء ورقي وموسيقى كلاسيكية صينية
وترابيزات وكراسي خشبية ورسوم وكتابات على الجدران بالحروف الصينية، وإضاءة باللون
الأحمر وشموع على الترابيزات ده غير الخصوصية الشديدة والأركان المخصصة للاجتماعات
وأماكن منفصلة للمدخنين وساحة خاصة للأطفال. جو صيني أصلي من أول الديكورات لحد
الشيفات الآسيويين اللي بـ تقابلهم وأنت داخل المكان، وساعتها تأكدنا أن التجربة
هنا هـ تكون ممتعة وجديدة.

المنيو مقسم لـ 3 أقسام: أكلات صينية وتايلاندية وهندية، وبما أن المنيو
كان كبير قوي وأصناف اللحوم والدجاج والمأكولات البحرية والخضروات متوفرة بأشكال
مختلفة من مطبخ للثاني، قررنا نستعين بمساعدة الجرسون المهذب اللي ما زهقش من كل
أسئلتنا عن الأصناف ومكوناتها، خبرتنا معقولة عن الأكلات الصينية والهندية، لكن
معلوماتنا شبه معدومة عن المطبخ التايلاندي، وعلشان طلبنا منه يرشح لنا طبق
تايلاندي مميز. قبل ما نتكلم عن الأطباق الرئيسية نحب نعرفكم أن المقبلات والشوربات
هنا رائعة وبمذاقات وتوابل فريدة. الشوربات الصينية زي الـ “وان تان” وشوربة الذرة
الحلوة وشوربة الخضار الحارة بالمشروم والبيض بسعر 15 جنيه، وبـ نرشح الأخيرة
لأنها تعتبر أيقونة الشوربات الصينية وفتحت نفسنا جدًا قبل الأكل، بس اطلب درجة
الشطشطة اللي تناسبك. وممكن من المنيو التايلاندي تجرب لفائف الجلاش أو القطائف
المحشوة دجاج أو شوربة البحريات بالريحان والأسعار من 15 لـ 22 جنيه.

مع الشوربة نزل بعض المقبلات الآسيوية زي الخيار بالثوم وشرائح الكابوتشا
الحمراء بالليمون، والظريف هنا أنك هـ تعرف تأكل بالعصيان الآسيوية (Chopsticks) حتى لو مش متعود تأكل بها لأنها بـ تكون ملتصقة
ببعضها وممكن تفتحها وتقفلها بسهولة زي الملقاط! بعد الشوربة والمقبلات بوقت مش
قليل نزل الأطباق الرئيسية والنودلز بالخضروات (19 جنيه) واللي كانت كميتها
معقولة. طلبنا من المنيو الصيني باربكيو اللحم البقري بالبصل الأخضر والخضار (44
جنيه) وده بـ يُقدم على طبق معدني ساخن وبـ ينزل على الترابيزة واللحم لسه بـ
يعمل صوت “طشطشة” داخل الطبق؛ نكهة خطيرة ومنظر شهي جدًا، تأخذ من اللحم بالصوص وتحط على
النودلز المقلية وعيش أجمل إحساس. من المنيو التايلاندي رشح لنا الجرسون طبق
الجمبري المقلي مع صوص جوز الهند (65 جنيه). إحنا كمان كنا رافضين مجرد الفكرة
لأننا كمان مش بـ نحب طعم جوز الهند، لكن الجرسون قال لنا أن الموضوع مختلف وطعم
الصوص مش زي ما إحنا متخيلين وجربوا وعلى ضمانة الشيف التايلاندي وقد كان. وحدات
الجمبري بالحجم الكبير نصف مقلية ومقرمشة مغموسة في صوص أبيض من جوز الهند الحلو
والكريمة والتوابل الخاصة والبصل الأخضر كانت أروع ما يكون، طعم مش ممكن يتنسي،
تقريبًا أفضل طريقة طهي جمبري جربناها في حياتنا، وكان الشكر واجب للشيف
التايلاندي، والجرسون اللي رشح لنا الطبق، وقال لنا أن نفس الصوص بـ يتعمل به البيف
ومكعبات البط وشرائح الدجاج بأسعار من 50 لـ 66 جنيه.

حلويات زي الموز والأناناس المقلي بالعسل أو بجوز الهند بأسعار من 16 لـ 19
جنيه، لذيذة وجديدة، وبلاش تستغرب المكونات أو طريقة التحضير لأن الناس دي عارفين
هم بـ يعملوا إيه، وأهم حاجة أن المكونات فريش وفي منتهى النظافة.

ما كانش فيه فرصة نجرب المطبخ الهندي النهاردة، وهو بالمناسبة جديد على
المكان، لكن أكيد هـ نجربه في يوم من الأيام، ونقدر نقول لكم روحوا على «دراجون
هاوس» بقلب جامد، الأسعار كويسة والقعدة أصلية وغير تقليدية والخدمة ودية وممتازة،
يمكن اللي ضايقنا شوية الدخان اللي جاي من المطبخ وملأ المكان وغيم الدنيا، والصوت
العالي لبعض زوار المطعم الأجانب، غير كده كل حاجة جميلة، وأكيد لنا زيارات ثانية.