The Definitive Guide to Living in the Capital , Cairo , Egypt

مطاعم

دليل كايرو 360 لأفضل أماكن الفطار والسحور فى الحسين

دليل كايرو 360 لأفضل أماكن الفطار والسحور فى الحسين
بواسطة
Nagla Ashraf

مافيش أجمل من أنك تروح مكان جميل مع ناس أنت بتحبهم، تقعد قعدة ممتعة وتاكل أكل مختلف، وكل ده وأكثر متوفر عند سيدنا الحسين.

ممكن ناس تسمي المنطقة دي خان الخليلي، ناس تبعد شوية في الشارع يقولوا عليها الغورية أو شارع المعز اللي جنبه جدًا، بس إحنا بالنسبة لنا المنطقة كلها عند سيدنا الحسين، لأن ما ينفعش نروح هناك من غير ما نروح ونصلي ركعتين، الحقيقة كل الناس لما تحب تروح مكان يحسسها بجو رمضان وصفاءه لازم تروح هناك، ويا سلام بقى لما يبقى سحور وبعدين نصلى صلاة الفجر ونروح.

 

الناس في الحسين تقريبًا مش بيناموا، لحد الفجر متواصل زحمة وصحبة وبركة غريبة، ما بتفرقش بقى المستوى الاجتماعي من السياح من المصريين اللي جايين من قرى بعيدة، كل الطوائف والمستويات بتتجمع هناك وتنبسط وتروح فرحانة.

تفطر فطير؟

لو بتحب المغامرة ننصحك تجرب تفطر فطير من عند “فطاطري الحسين” بيعمل فطير سخن وجميل مافيش بعد كده، ولو عاوز تاكل فول وبيض وتتسحر حاجات عادية الاختيار ده موجود برضه، ده غير أنه كمان بقى بيعمل فطير بالنوتيلا، يعنى مش بس حادق لأ في حلو ممتع كمان.

أما بقى لو عاوز تأكل أكل متين وتشبع لحد ما ما تبقاش قادر تتنفس، مافيش أحسن من “الدهان” يعنى كباب وكفتة وطرب وأرز وكل اللي قلبك يحبه، ولو حبيت تحلي بقى، هتلاقي لازق فيه محل “المالكي” يعنى أجمل أرز باللبن بالآيس كريم وأم على بالمكسرات.

كمان على الجانب الآخر فيه “جاد” قريب من مسجد الأزهر لو عاوز تاكل ساندويتشات خفيفة أو حتى أكلات عادية، لأن جاد بيقدم أكلات شرقية زي الشيش طاووق والفراخ المشوية والوجبات العادية بجانب الساندويتشات.

قعدة على الفيشاوي

أما لو مش بتحب تتقل في السحور وعاوز قعدة كويسة ومشروبات ممتازة، مافيش أحسن من “قهوة الفيشاوي” اللي مافيش أشهر منها هناك، كمان “قهوة سعد زغلول” كويسة، المهم وأنت ماشي في الشارع رايح لها ما تبقاش تنسى تشتري سبحة تذكار من هناك، مش هتلاقي نوع السبح ده إلا هناك بس، وما تنساش أن القاعدة الأساسية الفصال ثم الفصال لحد ما توصل لسعر معقول، ما تزودهاش برضه إحنا في أيام مفترجة.

والمكان اللي كل الناس بـ تروحه السنة دى تقريبًا هو “زينب خاتون” والحقيقة أننا زمان كنا فاكرين أنه مركز لتعليم فنون الموسيقى بس، لكن حواليه أماكن بتقدم سحور وقعدة مميزة جدًا.

نضمن لك.. الضامن

لكن لو عاوز تأكل أكلة مختلفة تمامًا ومواكبة لجو القاهرة القديمة يبقى لازم نروح ناحية شارع المعز، واللي عنده أحسن محل بيعمل كبدة ومخ بالسمسم خرافة واسمه “الضامن”، كمان فيه محل عصير “الكيلاني” واللي بيعمل ساندويتشات كمان، بس الاختراع اللي بجد اللي لازم تجربوه السوبيا المزة اللي بتتاكل مش بتتشرب وبيترش عليها قرفة من فوق علشان تكمل أسطورة المأكولات الشرقية.

وما نقدرش ما نحكيش عن ساندويتشات زيزو “زيزو نتانة” اللي معروف جدًا، بساندويشات الكبدة والسجق والحلو معروف، ساندويتش السكلانص.

ده بالنسبة للأكل هناك أما لو عاوز تستمتع بعروض مختلفة أو موسيقى راقية ممتعة، فمركز إبداع وكالة الغوري (الغورية) بيعمل حفلات يومية غير “الربع” وحفلاته الأسبوعية واللي تقدروا تتابعوا جدولهم من خلال أجندتنا.

مقترح