The Definitive Guide to Living in the Capital , Cairo , Egypt

مطاعم
ذا تاب إيست – The Tap East

ذا تاب إيست: أكبر تنوع ممكن تشوفه في مكان واحد في القاهرة

تم التقييم بواسطة
Omar Yousry
قيم
قيم الآن
ذا تاب إيست: أكبر تنوع ممكن تشوفه في مكان واحد في القاهرة

من ساعة ما "ذا تاب – The Tap" فتح في المعادي وعمل ظاهرة جديدة من نوعها في القاهرة، وقدر يقدم معايير جديدة للسهر لأنه بيعمل أكل هايل مع حفلات موسيقية ممتعة. وعلشان يزودوا شعبية "ذا تاب"، كشف جلال الكرداني مؤسس المكان أن تاب إيست هيركز أكثر على الأكل بمنيو جديدة متنوعة هتنزل في شهر مارس، ودي حاجة فعلًا كنا منتظرينها.

تاب إيست موجود في القاهرة الجديدة، وتحديدًا في شارع محمد نجيب داخل كومباوند ستيلا دي ماري، والمكان نفسه كبير بحوائط من الطوب الأحمر وبار كبير في وسط المكان ومسرح صغير في ركن من الأركان، مع ترابيزات عالية وألعاب فيديو وورق حائط رائع عليه صور للممثلة البريطانية أودري هيبورن ونجم الروك جيم موريسون أضافوا لمسة لطيفة للمكان وتعمل له شكل مميز.

من أهم المميزات في تاب ويست القعدة الآوت دوور بأجوائها القريبة من ملعب المدرسة بالبنشات الخشب والشماسي الحمراء والبار المميز.

نتكلم شوية عن منيو تاب إيست المختلفة عن فرعهم في المعادي المشهور بأكلات سهلة الأكل على البار زي البرجر والناتشوز وطبعًا أهم حاجة عندهم وهي أجنحة الفراخ، ونقدر نقول إن المنيو هنا متكاملة زي أي مطعم محترم، وفي نفس الوقت محافظ على شكل الأكلة الكاجوال البسيطة. بدأنا رحلة الأكل مع طبق مقبلات فرايد تشيز بولز (54 جنيه) وبالنسبة للأطباق الرئيسية اخترنا بروفولون تشيكن Provolone Chicken (84 جنيه) وفيليه بلاك آنجوس Filet Black Angus (145 جنيه).

كرات الجبنة المقلية وصلت في طبق مستطيل صغير، وكانت عبارة عن 5 كرات صغيرين من الجبنة السائحة متغطية بطبقة مقلية رائعة، ومعاهم صوص سويت شيلي.

نروح للبروفولون تشيكن اللي كان مختلف عن الطبق التقليدي، لأن الفراخ فيه كانت مقلية. الطبق كان عبارة عن قطعتين من صدور الفراخ عليهم مشروم وجبنة بروفولون بيتقدموا على طاولة خشب ومعاهم بطاطس مهروسة وخضار سوتيه. الفراخ كانت مقلية تمام وتتبيلتها 10/10، ونكهة الجبنة البروفولون كانت قوية شوية بس أضافت لطعم الفراخ من غير ما تطغى عليه.

البطاطس المهروسة كانت هايلة أما السوتيه فكان على قده ومستخبي تحت الفراخ، رغم أن المفروض وظيفته يعمل شكل حلو للطبق.

أما قطعة الستيك الآنجوس (200 جرام) فكانت متسويّة medium well وبتتقدم على نفس الخشب بتاع طبق الفراخ وبنفس الأطباق الجانبية، وطبعًا يميزها علامات الشوي السوداء الجميلة مع روعة قطعة اللحم العصارية اللذيذة اللي تحس فيها بالطعم المدخن الرائع. مافيش شك كمان أن اللحم كان جميل وصوص المشروم البني زود من جمال الطعم.

أخر حاجة قررنا نجربها قبل ما نمشي كان برجر تاب إيست المخصوص، وسبب تجربتنا للبرجر أنهم قالوا لنا أن مافيش حلو وقتها. الويسترن برجر (68 جنيه) عبارة عن عيش بريوش فيه بيف بيكون وخس وبصل وجبن سائح وصوص باربيكيو. صحيح البرجر كان عصاري وكل المكونات بتوعدك بساندويتش ماحصلش، بس طعم قطعة البرجر كان أقرب للكفتة، لكن المشكلة أن دهون اللحم كانت قليلة وقطعة اللحم صغيرة، وهنا تظهر أهمية الدهون في أنها تعمل الطعم المطلوب.

يمكن مستوى البرجر أحبطنا شوية، بس الأكيد إن تاب إيست أحسن مكان من نوعه في القاهرة الجديدة، لأنه قدر يجمع بين مميزات فرع ذا تاب الأصلي، من حفلات ممتعة وأجواء رائعة سواء على البار أو أكلة لذيذة، وأضاف عليها منيو هايلة.

نصيحة 360

لو كنت ما بتحبش تروح مكان فيه مشروبات كحولية، أكيد مش هتنبسط هناك لأن تاب إيست بيقدمها.  

أحسن حاجة

الأكل العظيم مع الأجواء الممتعة عملوا تجربة مالهاش مثيل.

أسوأ حاجة

أسعار الأطباق غالية بالمقارنة مع كميات الأكل.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح