The Definitive Guide to Living in the Capital , Cairo , Egypt

مطاعم
راج

راﭺ: مطعم هندي غالي في مصر الجديدة

  • فندق فيرمونت هليوبوليس
  • هندي
  • 6 مساءا - منتصف الليل - مغلق يوم الثلاثاء -
تم التقييم بواسطة
Haisam Awad
قيم
قيم الآن
راﭺ: مطعم هندي غالي في مصر الجديدة

مصر الجديدة مليانة مطاعم ومطابخ عالمية
كثير، بس ماكانش فيه مطابخ هندية مميزة لحد وقت قريب. لحد ما فتح مطعم «راﭺ»
في لوبي فندق فيرمونت هليوبوليس بجانب مجموعة مطاعم شهيرة زي «ليوناردو» و«لان
تانيا» و«اكوا لوس» و«فيوز بار». القعدة مقسمة لجزئين، واحد داخلي بمساحة صغيرة
وتراس، وجزء خارجي في اللوبي نفسه وسط غابة من النباتات.

أول ما قعدنا جالنا أكواب من مشروب لاسي
المانجو الهندي الشهير كمجاملة من المطعم وبعدها طبق من رقائق البابادمز الهندية
وصلصة مانجو علشان نغمس فيها الرقائق دي. اللاسي كان مالوش طعم بس قوامه اللي واخد
من الزبادي اللي فيه كان كويس في أنه بـ يغير الطعم بين كل طبق وطبق. البابادمز
كان مش قد كده هو كمان وكان هش وجاف زيادة عن اللزوم وكان محتاج شوية توابل.

كان
نفسنا في حاجة دسمة نبتدي بيها وجبتنا، فإختارنا السامسوساس (60 جنيه) ودي عبارة
عن معجنات حلوة محشوة بالبطاطس وكانت مقرمشة من الخارج وطرية من الداخل لكن برضه
كانت ناقصة شوية مكسبات طعم وكان الإعتماد على صوص التمرهندي اللي بـ يتقدم معاه. الصوص كان
مسكر قوي واستبدلناه بصلصة المانجو الموجودة على الترابيزة قدامنا، ولاحظنا أنه مش
فيه ولا نقطة نقطة زيت فإستنتجنا أنه مخبوز مش مقلي في الزيت.

من
منيو الأطباق الرئيسية جربنا اللال ماس (125 جنيه) ودجاج الماسالا (110 جنيه) ودول
من الأطباق الشعبية في إقليم راجاستان في الهند. اللال ماس عبارة عن لحم ضاني
بالكاري، مكعبات طازجة من اللحم طعهما خطير، لكن الصوص اللي معاه المكون من الثوم
والشطة والكركم والكسبرة ماكانش بنفس الجودة، كان مجرد خليط حار وخلاص.

دجاج
(تكا ماسالا) هو طبق تقليدي في الهند وتوقعنا أنه هـ يكون من أجمل الأطباق في
المحل والحقيقة أنه كان فعلًا كده. قطع دجاج كانت غنية بالطعم ومستوية كويس، وصوص
التكا كان غني وقوامه سميك، باين فيه طعم كل مكوناته؛ الطماطم وكريمة جوز الهند
والكسبرة، وخلصناه كله بعيش الثوم اللي طلبناه (20 جنيه) وده كان حل كويس بعد ما
الأرز اللي بـ يتقدم مع الدجاج خلص بدري قوي.

فيه
4 أنواع حلويات تختار منهم، احنا اختارنا (شريخاند المانجو) اللي سعره 45 جنيه،
وده مصنوع من زبادي مخلوط ببذور المانجو والشكل النهائي بـ يبقى زي المهلبية أو
البودنج وبـ يكون ناعم وسميك بس منعش وخفيف على المعدة. أسوأ حاجة في الطبق ده كان
بذر الرمان اللي بـ يدخل بين الأسنان!

من
الصعب أنك تحكم على الأكل في « راﭺ»
علشان في النهاية هو تم طهيه وتقديمة بجودة عالية جدًا والمكونات والمذاقات
المستخدمة من أفضل ما يمكن، وبـ نحترم الكميات البسيطة الموجودة في كل طبق رئيسي
على سبيل الإتيكيت، لكن احنا كنا متوقعين كميات أكبر من كده من الأكل الهندي اللي
بـ نحبه خاصة مع المبالغ اللي دفعناها.

نصيحة 360

المطعم بـ يقفل يوم الثلاثاء.

أحسن حاجة

التخصص الدقيق والمميز للمطبخ الهندي.

أسوأ حاجة

وجبة عادية لـ 3 أفراد كلفتنا 500 جنيه!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح