The Definitive Guide to Living in the Capital , Cairo , Egypt

وإحنا ماشيين في شارع لطفي حسونة اللي في الدقي، لفت نظرنا محل اسمه “رم رمه”، وديكوره المميز جذبنا ليه، وفورًا أخدنا القرار في كايرو 360 إننا نجربه علشان ننقل لكم خبراتنا مع أكل الشارع بشكله الجديد.

دخلنا المكان اللي عامل شغل عالي في الديكور ومعلق يفط وملون الكراسي وفيه راحة نفسية كويسة، ولكن ريحة “الشطة” كانت مسيطرة شوية على المكان اللي مكيف من الداخل.

بصينا في المنيو لقيناه بيعرف نفسه وسبب اختيار الإسم وتحديهم بنظافتهم وجودة أكلهم وسعرهم للجميع، وكمان كتبوا في المنيو شكر خاص للي سموهم ملوك “أكل الشارع”، وهما أشهر ناس بتعمل أكل شارع في مصر زي “أبو طارق – ملك الكبدة – على بركة الله – عز المنوفي – زيزو نتانة – عبده تلوث – الركيب – البرنس – صبحي كابر”.

جربنا من عندهم مجموعة حاجات كده علشان ننقل لكم الصورة الكاملة على قد ما نقدر، وأكلنا مكرونة سجق، بـ15 جنيه، وكمية كويسة جدًا بالنسبة للطعم الجامد بتاعها، مع التوابل اللي مش بتضيع الطعم الحقيقي للسجق، وكمان جربنا مكرونة الفراخ، بـ15 جنيه، وكانت متقطعة قطع صغيرة مع صوص خاص بيهم ومتظبطة بشرائح البصل والقوطة، وحقيقي استمتعنا ومكناش متوقعين ان الحجم والسعر والطعم ممكن يتعادلوا كده.

وكمان طلبنا أرز بالفراخ وسعر كان 12 جنيه، وفعلًا كان جميل جدًا، والفراخ كانت تقطيعة صغيرة مع صوص مظبوط ووشرائح البصل والفلفل والطماطم، ولكن كان كمية الفراخ والصوص قليلة، ومافيش مانع إنهم يزيدوا مع رفع السعر، وكمان جربنا سندوتشات الكبدة والسجق الإسكندراني وسعر الرغيف 5 جنيه بس، دول نقدر نقول عليهم نار يا حبيبي نار، بس هناكل منه ع طول، لأن من النوادر ناكل سندوتشات الطحينة فيها مسكرة، والسجق البلدي اللي كان بـ10 جنيه، كان ناقص له 2 فولت وينور من حلاوته وتتبيلته، لكن سندوتش الكفتة اللي بـ12 جنيه، كان عادي ومش واو.

 أما بقى وجبة “طاجن السجق” فالجواب مبنش من عنوانه، فكان طاجن صغير، وعلبة فيها أرز وبطاطس مقلية ومخلل متكحرتين ع بعض ودا قفلنا، ولكن علشان المهنية قلنا لازم نجرب، وعرفنا بعد ما جربنا أن أكل الشارع حلاوته في طعمه مش في شكله وطريقة عرضه، السجق كميته كويسة جدًا جوه الطاجن اللي باين إنه صغير، وعليه شرائح رفيعة من الطماطم والفلفل والبصل، ومتغطي في الموتزاريلا ومتقطع قطع كويسة تخليك تعرف تاكل، بالعيش “الـفينو” اللي بيبقى معاه.

تجربتنا في “رم رمه” كانت إيجابية جدًا.. وأكيد هنكرر الزيارة تاني وتالت ورابع.