The Definitive Guide to Living in the Capital , Cairo , Egypt

مطاعم
زاكس فرايد تشيكن – Zack’s Fried Chicken

زاكس فرايد تشيكن: أحلى فراخ مقرمشة ممكن تاكلها في 6 أكتوبر

مطاعم القاهرة، نقد، 6 أكتوبر
  • مول سيتي ستار – الحي الـ 11 – طريق المحور المركزي – 6 أكتوبر – بجوار بنك الإمارات دبي الوطني
  • 10:00 - 23:00
تم التقييم بواسطة
Angie El Batrawy
تقييمك
قيم الآن
زاكس فرايد تشيكن: أحلى فراخ مقرمشة ممكن تاكلها في 6 أكتوبر

كل شوية نشوف بوستات في صفحتهم على الفيسبوك وصور تجرى ريقنا، شوية جبنة سايحة، وشوية فراخ كريسبي شكلها مغري، وقصايد شكر في المكان، فقلنا ما بديهاش بقى، لازم نروح ونجرب، لعشاق الفراخ المقرمشة أو “البروستد” المكان ده لازم تروحوه، وإحنا بنتوقع أنه قريب صيته هيعلى ويفتح فروع أكتر.. إحنا بنتكلم عن زاكس فرايد تشيكن – Zack’s Fried Chicken.

زاكس فرايد تشيكن موجود في مول سيتي ستار في الحي الـ 11 في 6 أكتوبر، ما تتوقعش خالص لو أنت رايح مشي أو بالعربية أنك تلاقيه على الطريق بره، أركن عند المول واطلع كام سلمة هتلاقيه على الشمال، المطعم مساحته صغيرة جدًا وفيه 3 أو 4 ترابيزات، بس اللي اتفاجئنا به طابور طويل جدًا من الناس عند الكاشير وزحمة وبالتالي أخد المساحة الواسعة اللي أمام المطعم في ساحة المول علشان الناس تقدر تقعد وتاكل، الإضاءة مش أحسن حاجة والمكان قفلنا شوية لأنه كان عكس توقعاتنا بس التجربة كانت بتوعدنا بالأفضل.

المنيو عبارة عن صفحة واحدة بالعربي وظهرها بالإنجليزي، وفيه كمان منيو كبيرة على الحيطة اللي ورا الكاشير علشان تبقى واضحة أمام الناس كلها، المنيو كلها عبارة عن فراخ مقرمشة سواء ساندويتشات وفيه كام صنف مكرونة بصوص أبيض أو أحمر جواها برضه فراخ مقرمشة، أو بيتزا دجاج مع صوص أبيض أو أحمر.

الساندويتشات بيُقدم معاها بطاطس محمرة سادة أو بالجبنة وسلاطة كول سلو، وبتختار من نوعين: ساندويتشات عادية (من دور واحد) أو جو بريكرز Jaw Breakers ودي من دورين، واتسمت بالاسم ده لأنك محتاج تفتح بقك على آخره علشان تعرف تاكله، طلبنا من العادي ذا بيت The Pit بـ 40 جنيه عبارة عن صدور فراخ مقلية عليها بيكون وخس وطماطم وخيار مخلل وصوص شيدر وصوص باربكيو وصوص مايونيز، ومن جو بريكرز طلبنا بيج زاك Big Zack بـ 46.66 جنيه مكون من طبقتين صدور دجاج مقلي، وتركي وشريحتين جبنة شيدر وخس وطماطم وخيار مخلل وصوص شيدر وحلقات بصل مقلية وصوص باربكيو وصوص مايونيز، وطلبنا إضافة جبنة على البطاطس بتاعتها (5 جنيه)، ومشروب غازي (7 جنيه).

رغم الزحمة الرهيبة بس الأوردر ما أخذش وقت طويل، أنت بتطلب عند الكاشير وبتاخد رقم الأوردر بس الجرسون هو اللي بيجيبه لك عند الترابيزة، شكل الساندويتشات والبطاطس وكل حاجة أول ما وصلت خلتنا ننهار من فرط الجمال، تحمسنا وقطمنا أول قطمة وما ركزناش مع الناس اللي حوالينا غير لما خلصنا، الفراخ مقرمشة وحجمها كبير ومش مزيتة خالص، ونفس الشيء حلقات البصل، المكونات محطوطة بتوازن وفريش، البطاطس حلوة جدًا وخاصة اللي بالجبنة، الكول سلو كانت لطيفة بس كانت كميتها صغيرة جدًا جدًا، خلصناها في 3 معالق، طبعًا كلنا عارفين أن نوعية الساندويتشات دي بيبقى فيها زروطة بس هما كانوا عاملين حسابهم وبيدوك جوانتيات شفافة.

ساندويتشات زاكس أكبر دليل على أن إزاى الأكل بيغير الموود، إحنا مشينا مبسوطين وطعم كل حاجة لسه في بُقنا، لدرجة أن تانى يوم كنا عاوزين نروح تانى، نفسنا يعملوا كمان تحلية خفيفة علشان التجربة تكتمل أركانها. 

نصيحة 360

زاكس عندهم خدمة توصيل.

أحسن حاجة

فراخ مقرمشة حلوة ومش مزيتة، عاوزين إيه اكتر من كده؟

أسوأ حاجة

زاكس يستحق مكان أفضل وأكبر من كده.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح