The Definitive Guide to Living in the Capital , Cairo , Egypt

رنا شرف

إحنا من عشاق الأكل اللبناني، الفتوش والتبولة والكوسا بلبن وغيرها من الأكلات اللي بتحسسنا إننا سافرنا لـ بيروت! ومؤخرًا قررنا نروح نجرب مطعم لبناني، وهو زهرة بيروت، الموجود في كورت يارد المعادي، لكن للأسف التجربة ماكنتش على قد توقعاتنا، ونقدر نقول إن سلبياتها أكتر من إيجابياتها.. تعالوا نعرف التفاصيل.

في مجمع كورت يارد المعادي المعروف لكتير مننا، لفت نظرنا مطعم لبناني اسمه مميز، “زهرة بيروت”، قولنا لازم نجربه، وبالفعل عجبنا شكله، المكان فعلًا حلو وديكوراته شيك، والكراسي مريحة والترابيزات تصميمها حلو، كمان المنيو شكله شيك وعليه صور لفنانين لبنانين زي صباح ووديع الصافي.

لكن للأسف الشكل أحيانًا بيكون خداع! أول حاجة لاحظناها هي إن الخدمة بطيئة بشكل كبير، رغم إن المطعم شبه  فاضي، وشوفنا حالة توتر غريبة وغير مبررة في أغلب فريق عمل المطعم.

نيجي بقى للأكل، بما إننا في مطعم لبناني فكان لازم نجرب الفتوش، والفتوش كان معقول، لكن كان ممكن يكون أفضل، وحسينا إنه مش معمول بمزاج. سعر سلاطة الفتوش 62 جنيه، والحقيقة إن ده مبلغ كبير على الطبق اللي جالنا.

جربنا كمان سمبوسك الجبنة، وبرضه كانت معقولة، وماحسيناش إن فيها حاجة تميزها، وحسينا إن لو كانت حشوة الجبنة أكتر كانت هتبقي أجمل، وسعرها 46 جنيه.

طلبنا كمان كفتة بالطحينة، والطبق كان جميل، والطحينة طعمها مميز وتقيلة، ونزل لنا معاها أرز، وكان أسوأ طبق أرز جربناه، الزيت فيه كتير ومش مستوي كويس، السعر كان 145 جنيه.

طلبنا مسحب دجاج، ودي عبارة عن فراخ مخلية ومشوية بتنزل معاها بطاطس مهروسة. البطاطس جميلة والفراخ ماكنتش سيئة لكن مش مبهرة، وكانت عادية وسعرها 140 جنيه.

لاحظنا إن عدد كبير من الزبائن بيشتكوا من مستوى الأكل، وماحسيناش إن فريق العمل قادر على التواصل الإيجابي أو حل المشاكل بذكاء.

رغم إن المكان جميل، لكن فيه حاجة مش مظبوطة في زهرة بيروت تخليك غير راضي عن التجربة ككل! والحاجة الإيجابية الوحيدة كانت استمتاعنا بالمناظر الجميلة في مجمع كورت يارد المعادي.