The Definitive Guide to Living in the Capital , Cairo , Egypt

مطاعم
سفاري

سفاري: مطعم ملئ بالأخطاء في داندي مول

  • الكيلو 28 طريق مصر / الإسكندرية الصحراوي
  • عالمي
  • 24 ساعة -
تم التقييم بواسطة
Angie El Batrawy
قيم
قيم الآن
سفاري: مطعم ملئ بالأخطاء في داندي مول

فى زيارتنا الأخيرة لداندي مول وخاصة فى المنطقة الخارجية اللى فيها صفين جنب بعض مطاعم وكافيهات أشكال وألوان سوء حظنا وقعنا فى مطعم بدون لوجو –بس اسم المكان بخط عادي “سفاري – Safari”- كان شكله غير مشجع بالمرة ومافيهوش أى عناصر جذب، ولكن بما أن شغلتنا فى كايرو 360 “فئران تجارب” كان لازم ندخل ونستكشفه.

مكتوب أن المكان من سنة 1800! مش عارفين إزاى بس ساعات –بشكل شخصي- مش بـ نصدق الأعوام اللى بعض الأماكن بـ تكتبها، وكاتبين كمان فى الشعار “Smell the hot taste of Safari”، لكن بالنظر فى المنيو ما حسيناش إيه علاقة الأطباق المقدمة بالسفاري؟

فيه أقسام للسلاطات، والمقبلات وأطباق اللحوم والفراخ والطواجن والباستا يليها الحلو والمشروبات الباردة والساخنة والآيس كريم، المكان فى الهواء الطلق وفيه جزء يعلوه برجولا والثاني بدون، الكنب مش معتنى به، فيه خروم من حرق سجائر ومترب، وكمان المنيو لما جاءت لنا كان عليها تراب كثير كنا ماسكينها بأطراف أصابعنا، أول ما بـ تطلب بـ ينزل لك سبت عيش وقراقيش بدون زبدة أو أى صوص نغمس فيه، فكانت البداية “ناشفة” جدًا.

كنا محتارين نأخذ إيه من الأطباق، وقت زيارتنا ما كانش موجود البيف، اختارنا سكالوب كوردون بلو (56 جنيه) وبيكاتا بالمشروم (49 جنيه) الاثنين باختيارات جانبية: خضار سوتيه وبطاطس محمرة، ومعاهم شوربة خضار (12 جنيه)، جاءت لنا الشوربة فى الأول بعد فترة وجيزة، سخنة شوية وفيها قطع خضار زي اللى فى السوتيه مقطعة صغيرة، مرقة الشوربة كانت مضبوطة وطعمها جيد كبداية لقعدتنا لكن مافيهاش شيء مميز، كانت محتاجة طعم مميز للمكان.

الأطباق الرئيسية جاءت لنا بعد فترة كبيرة، أول صدمة أنهم جابوا لنا ميكس جريل بدلاً من السكالوب، رجعنا الطلب واتصدمنا الصدمة الثانية لما لقيناهم مبدلين البطاطس المحمرة بالأرز، كل ده بسبب أن الجرسون قعد يسألنا كذا مرة على طلبنا واتلخبط ومش بـ يدون اللى بـ نقوله، وبالتالى دى نتيجة طبيعية، انتظرنا السكالوب يتحضر ونزل لنا الجرسون طبق إضافى بطاطس تصحيحًا للخطأ، البيكاتا كانت جيدة والصوص كمان قوامه جيد، الخضار السوتيه كان طازج برضه وكميته معقولة لكن شرائح المشروم اللى كانت فيه محتاجة تستوي أكثر، وضايقنا بقى لما لقينا حتة فويل صغيرة داخل الأرز وإحنا بـ نأكل!

السكالوب جاء لنا بعد فترة وبرضه –للمرة الثالثة- غلطوا وجابوا لنا أرز بدلاً من البطاطس! كملنا أكلنا وإحنا متضايقين من كم اللخبطة دي، السكالوب مقلي بزيادة ولونه كان غامق وعليه من فوق جبن موتزاريلا وقطع صغيرة فلفل وزيتون، من الداخل مش فاهمين إزاى كوردون بلو ومافيش جواه غير شرائح مشروم!

من الحلويات أخذنا بروفيترول (26 جنيه) كان الحسنة الوحيدة تعتبر فى قعدتنا وخاتمة اليوم، قوام الشوكولاتة إلى حد ما خفيف والكمية كويسة وعجينة الشو بالداخل كانت هشة، وعليها كريمة مخفوقة خفيفة من فوق.

نزل لنا أول ما قعدنا زجاجة مياه،  لكن وإحنا بـ نحاسب لقيناهم كاتبين “حجم كبير بـ 5.50 جنيه مع أنها كانت أصغر من الحجم الصغير، لما استفسرنا من اللخبطة الرابعة دي لقينا الجرسون بـ يبرر لنا أنها دلوقت زيها زي الصغيرة لأن مافيش مياه فى السوق فرافعين سعرها!!

“سفاري” بـ يضيفوا 10% خدمة و12% ضريبة، لكن إحنا رأينا أن الخدمة هنا “صفر” والتركيز والدقة “تحت الصفر”، ده حتى فى الـ Receipt كاتبين أن اسمهم “Solidaire”، المرة الجاية أكيد هـ نتحكم فى رجلنا وهى بـ تودينا المكان ثاني.

نصيحة 360

المكان بـ يقدم شيشة لكن غير مذكور أى تفاصيل عن أسعارها.

أحسن حاجة

البروفيترول.

أسوأ حاجة

شوية تركيز وخدمة كويسة مش مضرين.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح