The Definitive Guide to Living in the Capital , Cairo , Egypt

مطاعم
سمسمة – Semsema

سمسمة: ملك الشاورما أخيرًا بقى له فرع ثاني فى داون تاون الشيخ زايد

تم التقييم بواسطة
Angie El Batrawy
قيم
قيم الآن
سمسمة: ملك الشاورما أخيرًا بقى له فرع ثاني فى داون تاون الشيخ زايد

وأخيرًا.. الخطوة دي كانت لازم تحصل من زمان، مكان ناجح زي "سمسمة – Semsema" اللى كلنا مرتبطين به من طفولتنا كان لازم يكون له كذا فرع من زمان، يمكن صاحب المكان كان خايف أو مش مستعد أو عاوز الناس تفضل مرتبطة بمكانه الرئيسي فى شارع الدقى، لكن القرار ده اتغير –لحسن حظنا- وفتح فرع جديد فى الشيخ زايد فى داون تاون مول.. وبالتالى مش هـ نفوت فرصة أننا نروحه.

مول داون تاون مساحته مش كبيرة أوى، هـ تلاقى هناك كمان "الفرن – El Forn" كنا كتبنا عنه من فترة، وفيه كافيه كمان شغال جنب سمسمة وبتاع فطير وبيتزا هـ نكتب لكم عنه قريب، وكام مكان لسه بـ يتشطبوا، المحل صغير بالنسبة لفرع الدقى، والقعدة فيه Outdoor كام ترابيزة بره وزي الدقى فيه حد بـ ييجي ياخد الأوردر بتاعك (على عكس الدقى ممكن تطلب فى العربية).

المنيو مش مختلفة عن الدقى، ما ينفعش نروح لسمسمة من غير ما ناكل الشاورما الأسطورية بتاعته، فطلبنا فتة شاورما لحم (22 جنيه)، وساندويتش شاروما لحم فرنساوي (16 جنيه)، وطبق خضار سوتيه (6 جنيه) ومياه غازية (4 جنيه)، طلبنا ما أخذش وقت كثير، أول حاجة وصلت الساندويتش، الشاورما لا غبار عليها نفس الطعم محافظين عليه والجودة، أحببطنا بس لأنهم كانوا حاطين الطحينة على الساندويتش من فوق بس ومن جوه مافيش، والساندويتش كان ملفوف بورق فلما شيلناه اتشالت كل الطحينة اللى على الوش في الورقة، فيا ريت بس يركزوا يخلوا الطحينة من جوه مش يحطوها على الطرف بس.

بعد كده الفتة وصلت، حجمها كبير جدًا على شخص واحد، عبارة عن طبقة أرز وطبقة شاورما لحم أو فراخ وطبقة عيش مقرمش، وممكن تختارها بصلصة أو من غير، كمية الصلصة والشاورما كانت قيلة على كمية الأرز –فى رأينا- فطلبنا من الولد اللى بياخد الطلبات يزودها لنا، إضافة شاورما لحم (6 جنيه) والصلصة بـ تتزود عادي، الطبق اتأخر علينا شوية لأنهم بـ يسخنوا الصلصة ثاني من الأول، ونزلوا معاها كمان طبق الخضار سوتيه اللى طلبناه.

الفتة كان طعمها حلو أوى، المكونات مع بعض طعمها متناسق والصلصة ما كانتش مشطشطة، الكمية كبيرة بس ممكن تقسمها مع شخص ثاني، الخضار السوتيه كان مقطع قطع صغيرة أوى (عكس الطبيعي فى أغلب المطاعم) شبه الخضار اللى بـ يباع فى أكياس مجمدة فى السوبر ماركت، طعمه كان لطيف لكن مش المفضل بالنسبة لنا الصراحة.

"سمسمة" عنده حلويات زي المهلبية والأرز باللبن والقرع عسل وكريم كراميل وجيلى بالفواكة (5 جنيه للواحدة)، ما قدرناش نذوق ولا واحدة منها لأن بطننا على آخرها.. ما ننكرش أننا انبسطنا بالفرع الجديد فى الشيخ زايد، لكن فرع الدقى هـ يزال له معزة خاصة فى قلوبنا لأننا مرتبطين به بذكريات كثيرة من صغرنا، حتى الروح هناك وشكل العربيات وهى واقفة بـ تطلب أكل والناس واقفة تاكل سوا فى الشارع ما يتعوضش.

نصيحة 360

"سمسمة" لهم صفحة على الفيسبوك لفرع الدقى، وكمان بـ يعملوا أكل للحفلات والطلبات الخاصة، اتصلوا بـ 01212129919.

أحسن حاجة

سمسمة بقى له فرع ثاني.

أسوأ حاجة

الطحينة اللى طارت فى ورقة الساندويتش.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح