The Definitive Guide to Living in the Capital , Cairo , Egypt

مطاعم
سوفرانو – Sovrano

سوفرانو: مطعم مستخبي في هليوبوليس بيقدم أكل هايل وأجواء ممتازة

تم التقييم بواسطة
Omar Yousry
قيم
قيم الآن
سوفرانو: مطعم مستخبي في هليوبوليس بيقدم أكل هايل وأجواء ممتازة

كل شلة أصحاب دائمًا بيدوروا على مكان خاص بهم، مكان يحسوا فيه بالراحة مع أكلة حلوة. ويا سلام لو شوية ترفيه. صحيح في كذا مكان كويس، وكل واحد فيهم بيقدم حاجة أو اثنين من طلبات الشلة دي. بس الصعوبة إنك تلاقي كل حاجة في مكان واحد.

“سوفرانو-Sovrano ” مساحته كويسة وفيه قعدتين إن دور، مع منطقة أوت دوور كبيرة. المكان بسيط وتصميماته لطيفة. وفيه ثلاث شاشات عشان الماتشات. وألعاب منها الطاولة. سوفرانو كمان فيه ميزة مهمة وهي موقعه، لإنه موجود في شارع جانبي هاديء، قريب من ميدان الاسماعيلية في هليوبوليس. الأجواء هنا في سوفرانو هادئة. وضيوف المكان ما بين مغتربين وناس شغالة على اللاب توب بتاعها، لناس بتلعب كوتشينة وناس بتتكلم مع بعض.

ندخل على منيو سوفرانو الكبيرة، اللي بتقدم أطباق من المطبخ الشرقي وأطباق تانية من مطابخ عالمية. وفيها كل حاجة من السجق الشرقي لغاية الكوردون بلو. بعد ما طلبنا الأكل وصل طبق المقبلات Mix Sovrano platter  (ثمنه 65 جنيه) بعد حوالي ربع ساعة. الطبق ده عبارة عن ثلاثة موتزاريلا ستيكس، وأربعة سبرينج رولز، وخمسة تشيكن فينجرز، وشوية حلقات بصل وناتشوز، ومعاه صوص باربكيو وهوني مسطرد.

نبتدي مع الموتزاريلا ستيكس اللي كانت بحجم سيجارة ومقرمشة، وتتبيلتها كويسة وفيها جبنة سايحة. وطبعًا الطعم بيكون أحلى لما تغمسها في صوص الباربيكو. بعدها دخلنا على السبرينج رولز المقرمشة بخضرواتها المستوية كويس، وكان ممكن تكون روعة لو قدموا معاها صوص سويت شيلي.

أما حلقات البصل فمكانتش مميزة في أي حاجة، بس الميزة الوحيدة إن جودتها كويسة. التشيكن فينجرز كانت مزيتة شوية، بس مش لدرجة التقليل من القرمشة والتتبيلة الحلوة. آخر حاجة معانا هي الناتشوز، المعمولة مخصوص عشان تغمسها في الصوص. وبصراحة عملت اللي عليها مع طعم صوص الهوني مسطرد والباربكيو الجميل، بس منقدرش نقول إن الناتشوز فيها أي حاجة مميزة.

دخلنا بعدها على بيتزا تشيكن باربيكيو (47 جنيه) وسط. عليها فلفل أخضر وزيتون وقطع فراخ مشوية وصوص باربكيو. لو فكرت تأكل من غير شوكة وسكينة الموضوع هيكون لغوصة شوية، فنصحية بلاش أحسن. البيتزا بشكل عام كانت هايلة وطعم المكونات ماشي مع بعضه وأهم حاجة إن صوص الباربكيو مش طاغي على الطعم.

نروح على الفور تشيز باستا (39 جنيه) العايمة في بحيرة من الجبنة. ونقول إنها كانت أقرب حاجة لقلبنا. هنا بتختار نوع الباستا اللي تحبه مع أربع أنواع جبنة، وكل قطمة منها غنية بطعم ورائحة الجبنة اللذيذة. وأكتر طعم جبنة قدرنا نميزه كان البلو تشيز اللي أضافت طعم لاذع شوية للأكل.

أما الحواوشي (33 جنيه) فكان عبارة عن ثمانية ساندويتشات حواوشي صغيرة، مزيتة شوية بس لهم طعم لذيذ. واللحمة متبلة كويس جدًا وطعمها يفتح النفس. بينزل مع الحواوشي بطاطس محمرة، عليها بابريكا وملح وفلفل علشان يدلعوا البطاطس.

طبعًا سوفرانو عندهم شيشة، جربنا منها شيشة سوفرانو عنب (41 جنيه) واضح فيها نكهة العنب المسكّر، وبكده نقدر نقول إنهم قدروا يجمعوا كل حاجة في مكان واحد.

في نهاية تجربتنا لازم نعترف إن سوفرانو مكان هايل للخروج بأكله الكويس والخدمة الهايلة والأجواء اللطيفة – ودي حاجة صعب تجتمع في مكان واحد – أكتر من معظم الأماكن الشبيهة لهم.

نصيحة 360

وأنتم بتطلبوا الشيشة اسألوا عن أسامة وهو هيقوم بالواجب.

أحسن حاجة

الفور تشيز باستا وجبنتها الخرافية.

أسوأ حاجة

صعب تلاقي ركنة قريبة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح