The Definitive Guide to Living in the Capital , Cairo , Egypt

رغم أن عمره سنة تقريبًا إلا أننا بصعوبة أخذنا بالنا منه في زيارتنا الأخيرة لمول الداون تاون في التجمع الخامس، مطعم وكافيه «سيفين جراينز – Seven Grains» أو “السبع حبات” عجبنا اسمه قبل أي حاجة، وبعد ما عبرنا بنظرنا كل اللافتات المضيئة والأسماء المشهورة في واجهة الداون تاون زي «قويدر» و«مكاني» وغيرها، لاقينا المدخل بإضاءة بسيطة وبوابة صغيرة، علشان كده مش واضح قوي بين كل الأضواء اللي هناك، واللي زود المشكلة كان الكتابة على اللافتات كانت باللون النحاسي الغامق، لدرجة أننا ما كناش عارفين نميز الاسم المكتوب. داخل المطعم مساحتين للجلوس، واحدة أقرب للمفتوحة أو مغطاة بالبلاستيك المعتاد، ومساحة داخلية مغلقة تمامًا تعتبر داخل مول S2 نفسه ومنه فيه بوابة تدخلك لقلب المول كعادة كافيهات الداون تاون.

مافيش شيشة هنا، وتقريبًا مافيش تدخين في بعض الأماكن، ميزة مش هـ تلاقيها بسهولة في معظم الكافيهات، ولأننا غير مدخنين كانت متعتنا مضاعفة وعجبتنا قعدتنا على الكنبات الكبيرة المريحة رغم أن كان فيه عيد ميلاد في المكان وسبب لنا بعض الإزعاج في البداية، لكن خلص بسرعة ورجعت الأمور لطبيعتها وبدأنا نتفرج على المباريات على الشاشات الموجودة في كل ركن، والأجمل أنهم كانوا مشغلين أغاني الكريسماس واحتفالات العام الجديد من الخمسينيات لحد النهارده، فعلًا لفتة ظريفة وكانت مناسبة جدًا للأجواء الاحتفالية والزينة اللي حاطينها في المكان بمناسبة قرب احتفالات رأس السنة.

منيو «سيفين جراينز» عالمي ومتنوع فيه أطباق الستيك والدجاج والسلامون والجمبري بالإضافة للبيتزا والباستا والساندويتشات والشوربات والسلاطات، ومجموعة كبيرة من الحلويات والكوكتيلات والمشروبات الساخنة. لازم تجرب طبق المقبلات الـ All in One اللي باسم المكان (85 جنيه) وهو صحيح فيه كل حاجة لكن بكميات صغيرة، قطعتين من الموتزاريلا ستيكس وشوية حلقات بصل مقلية ودجاج تندر بطاطس بيوريه بالجبنة و صوصات مسطردة العسل والمايونيز والصويا، اللي نفعنا قبل الطبق ده كان خبز البروشيتا بالجبن مع الخل البلسمي وزيت الزيتون اللي بـ ينزل مجاملة من المكان، تقريبًا كده وجبة كاملة من المقبلات وفواتح الشهية قبل الأطباق الرئيسية، وكل المقبلات خطيرة بالذات التندر الحار جدًا، لكن حلقات البصل كانت دون المستوى.

ستيك السلامون (99 جنيه) مع النودلز كان اختيار موفق، صحيح السمك كان مستوي زيادة شوية لدرجة أنه كان فيه أجزاء بـ تقرمش، لكن التتبيلة حلوة والسمك فريش والنودلز غنية بالجبن والأعشاب، طبق الستيك سالمون ما ينفعش تأكله بثقة في أي حتة، لكن إحنا بـ نرشحه لك هنا. الـ Chicken Creamy عبارة عن صدور دجاج مشوية (70 جنيه) غرقانة في كريمة مشروم وجبن بارميزان، قُدمت مع خضار سوتيه وأرز أبيض، من أجمل أطباق الدجاج اللي أكلناها مؤخرًا وأظهرت تمكن شيفات «سيڤين جراينز» بشدة. نفس الكلام على البيتزا الـ Seven Toppings أو اللي عليها 7 إضافات، أو نقدر نقول كل الإضافات ماعدا السي فوود (60 جنيه) كانت ممتازة وكل مكوناتها فريش وحجمها كبير ممكن يشبع فردين.

ماتعديش اليوم هنا من غير تجرب الشوكليت فوندو (35 جنيه) المتفجر بالشوكولاتة والآيس كريم، صحيح أخذ وقت شوية على ما جاء لنا بس الانتظار كان بفائدة ولغوصنا في الشوكولاتة لحد ما شبعنا. ليمون بالنعناع وسايدر تفاح بعد الأكل (15 جنيه) كانوا ختام لوجبتنا الرائعة في المطعم المستخبي في الداون تاون مول، ومش هـ يفوتنا نقول لكم أن الخدمة هنا أكثر من ممتازة واستمتعنا بكل دقيقة قضيناها سواء وإحنا منهمكين في الأكل أو وإحنا بـ ندردش وبـ نسمع مزيكا حلوة.