The Definitive Guide to Living in the Capital , Cairo , Egypt

مافيش حد ينكر إن المناطق الجديدة زي 6 أكتوبر والشيخ زايد والقاهرة الجديدة هم المسيطرين دلوقتي على الخروجات، بس الأكيد إن مدينة نصر محتفظة بمكانتها ومحلاتها المميزة، ومن أجدد المطاعم هناك “تشيلي باز-ChilliBuzz”، الأخ الأصغر لتشيلاكس.

تشيلي باز مميز بتصميمات المكان المتوسط حجمًا باللون الأصفر والأسود والديكورات اللي تجمع بين الخشب والمعدن، مع ترابيزات بقرصة خشب وهيكل معدن، وكراسي خشب عالية وكراسي تانية سوداء معدنية.

يمكن المطعم لما روحنا كان تقريبًا فاضي، بس الغريبة إن المنيوهات وصلت بعد ربع ساعة كاملة! المهم، قررنا نبتدي مع تشيكن وينجز (29 جنيه) بصوص باربيكيو وموزة بلاست (42 جنيه) كومبو (18 جنيه) وسويت سبايسي بيكون تشيلي (42 جنيه) برضه كومبو (18 جنيه).

الأغرب إن بعد ثلث ساعة وصلت الوينجز ومعاها البطاطس بتوع الاتنين كومبو، بس بصراحة طعمها كان تحفة خصوصًا مع طعم الصوص المميز والفراخ الطرية والطبقةالمقلية المقرمشة.

أما البطاطس فواضح إنها مش طازة، بس البهارات اللي عليها عملت نكهة لطيفة؛ هي عمومًا مفيهاش حاجة مميزة تستحق نتكلم عليها. أما التشيلي فرايز فكانت معمولة بنفس البهارات وزيادة عليها شوية جبنة شيدر ولحمة مفرومة، ولما وصلت كانت باردة وطعمها مش على المستوى.

بعد ربع ساعة كمان وصلت أطباق البرجر والبداية مع الموزة بلاست، ودي قطعة برجر 200 جرام عليها جبنة شيدر وخس ومايونيز وقطعتين أصابع موتزاريلا. هنا برضه حسينا إن الموضوع عادي جدًا حتى مع قطعة البرجر العصارية، خصوصًا إنها مش مستوية كويس ومحتاجة تتبيلة تعمل لها طعم مميز.

نروح للسويت سبايسي بيكون برجر وهو قطعة لحمة 200 جرام عليها صوص باربيكيو مسكر ومشطشط مع جبنة شيدر وقطع بيكون ومايونيز.

المشكلة في الساندويتشنفس اللي قابلتنا مع الساندويتش الأولاني من تسوية اللحمة والتوابل القليلة. مشكلة تانية كمان لاحظناها إن الصوص والمايونيز كانوا كتير جدًا وطعمهم كان أقوى من قطعة البرجر نفسها أصلًا.

وصلنا أخيرًا للحلو وطلبنا فرينش توست (36 جنيه)؛ طبق أبيض كبير عليه شريحتين توست معاهم بولة آيس كريم فانيليا وكلهم عليهم صوص كراميل.

التوست كان قلبه طري جدًا ومقرمش من الأطراف، ويا سلام عليه مع الآيس كريم وصوص الكراميل المسكر اللي عملوا شغل عالي. بصراحة الطبق ده هو أحلى حاجة حصلت لنا يومها.

إحنا شايفين إن تشيلي باز بشكل عام هيقدر يستمر لوحده بعيدًا عن تشيلاكس، لكن المشكة إن مفيش أي حاجة مميزة عندهم وأكيد في ناس هتعتبرهم تقليد لمطعم مينس. بتسألونا دي حاجة حلوة ولا وحشة؟ هي وجهات نظر بصراحة.