The Definitive Guide to Living in the Capital , Cairo , Egypt

المسئوليات ومشاكل الحياة اليومية ممكن تخلينا نخرج عن شعورنا ونحس بالكآبة. هنا بتظهر أهمية الأماكن اللي بتدلعك وتنسيك دوشة وزحمة القاهرة وعيشتها الصعبة.

فرع صوفياز جاردن في كايرو فيستيفال سيتي، المطل على النافورة الراقصة، يتميز بالهدوء والراحة. كأنك سافرت اليونان وطلعت على شواطئ سانتوريني الساحرة. وده بفضل لون المكان الأبيض مع لمسات من الأزرق الفاتح. الأجواء السكندرية اليونانية طاغية هنا على كل حاجة، من المنيو لجو المكان العام.

بعد ما طلبنا الأكل، أول حاجة وصلت كانت المشروبات في كاسات جذابة. يعني مثلًا المانجو (25 جنيه) كانت في قلة زجاجية، ولها طعم مسكر لذيذ ومنعش. أما الموز بالفول السوداني (45 جنيه) فبيتقدم في دورق صغير، وواضح فيه نكهة زبدة الفول السوداني القوية، مع طعم الموز وقوامه القريب من السموزي.

بعد حوالي عشر دقائق وصلت المقبلات، والبداية مع mix satay (ثمنه 49 جنيه) المكون من ستة أسياخ، ثلاثة منهم لحمة وثلاثة فراخ، ومعاهم ساور كريم وصوص فول سوداني. بعدها كان الدور علىBBQ chicken stuffed bread (ثمنه 48 جنيه)، عبارة عن شرائح عيش وجبنة موتزاريلا وصلصة، وطبعًا الفراخ.

الفراخ واللحمة كانوا مشويين كويس ولهم طعم لذيذ، والطعم بيكون أحلى وأحلى مع صوص زبدة الفول السوداني المزز، اللي فيه قطع سوداني والساور كريم بنكهة النعناع المنعشة. أما بالنسبة للفراخ بصوص الباربيكيو، فكانت عبارة عن قطع فراخ مشوية عليها صوص باربيكيو مسكر، ومعاها شوية فلفل وشرائح بصل مشويين. والطبق ده يعتبر من أحلى الأكلات اللي بتجمع بين النكهة المسكرة والحادقة.

بعد حوالي ثلث ساعة وصلت الأطباق الرئيسية، وخلونا نبتدي مع Fish Fillet Gratin (ثمنه 85 جنيه). عبارة عن قطعة فيليه عملاقة عليها جمبري صغير، وكمية جبنة شيدر سايحة محترمة. ومعاهم بولة رز صغيرة بالجمبري والخضروات. قطعة الفيليه كانت روعة ومستوية كويس. والموتزاريلا الثقيلة عملت شغل كويس مع السمك، وخصوصًا لما تقلبهم في الأرز الغني بالبهارات. ونقدر نقول إن الطبق ده هو أحسن حاجة حصلت يومها.

طبقنا التاني كان Lady Fillet (ثمنه 145 جنيه)، عبارة عن أربع قطع لحمة مدورة على طاسة، ومعاهم بطاطس مهروسة وصوص مسطردة وفلفل ومشروم بني.

اللحمة كانت مستوية كويس وتتبيلتها عشرة على عشرة. وكمان الصوصات يعتبروا إضافة هايلة لطعم الأكل. أما البطاطس المهروسة فكانت لذيذة وتتبيلتها هايلة.

أخر طبق معانا هو Caramel Burger (ثمنه 50 جنيه) الشهير. بدل اللحمة هتلاقي آيس كريم شوكولاتة، وبدل الجبنة قطعة كوكي. أما العيش ففوق الساندويتش بيكون تشيز كيك متغطية كراميل وسمسم. أما تحت فعبارة عن كيك كراميل.

حسينا وإحنا بنقطع البرجر إننا في عالم تاني، ويا سلام على الجمال وانت بتدوق كل المكونات في قطمة واحدة. بصراحة مفيش أحلى من التشيز كيك كراميل، والكيكة اللذيذة وقطعة الكوكي المقرمشة، والآيس كريم شوكولاتة، لما يتجمعوا مع بعض في سيمفونية ساحرة.

صوفياز جاردن لعبها صح، وعرف إزاي يجمع بين الأكلة الحلوة والموظفين الممتازين، مع أجواء مريحة هادئة. كل المطاعم بتحاول توصل للتوليفة دي، بس قليل منهم اللي قدر يحقق المعادلة الصعبة. يمكن الأسعار هناك غالية شوية بالمقارنة مع المطاعم المجاورة، بس الجودة الممتازة والخدمة الهايلة فعلًا يستاهلوا.