The Definitive Guide to Living in the Capital , Cairo , Egypt

بقلم وكاميرا: رنا شرف

مين يقدر يقاوم الفلافل وهي سخنة، ولا طبق فول عليه ليمون وزيت زيتون؟ ويا سلام لو مع الأكلة دي نزل طبق سلطة فريش!

لو نفسك في مكان حلو بيقدم أكل مميز بسعر معقول، ننصحك تروح طبالي. هناك هتلاقي عدد كبير من عشاق الأكل المصري الشعبي، واللي ماحدش بيختلف عليه.

في السطور الجاية هنعرفكم أكتر على تجربتنا في مطعم طبالي فرع الكوربة.

أول ما وصلنا المكان لاحظنا الديكورات المميزة اللي تخطف العين، من أول الزجاجات اللي متعلقة في السقف، لحد الركن المميز اللي بيضم تليفون قديم ومنبه من زمن فات. الحقيقة ديكور المكان بشكل عام مميز، وأكيد الناس اللي بتحب التصوير هتلاقي نفسها هناك.

نيجي بقى للأكل، أول صنف جربناه في المكان كان حواوشي، وكان جميل رغم إننا حسينا إنه دسم شوية، لكن بشكل عام كان لطيف، وسعره 94 جنيه، الطبق كان معاه خس، وكنا نتمنى ينزل معاه طحينة.

تاني طبق جربناه في المكان هو الكفتة، والحقيقة كان لذيذ، والكفتة كانت مخدومة كويس ومعاها طحينة عظمة، وجربنا معاها بطاطس، طبق الكفتة كان سعره 97 جنيه، والبطاطس سعرها 28 جنيه.

بعد الأكل اللي استمتعنا بيه، حبينا نجرب المشروبات في المكان، لكن للأسف الليمون بالنعناع ماكنش أحلى حاجة، وكان سعره 29 جنيه.

بشكل عام نقدر نقول إن تجربتنا في المكان كانت إيجابية، وأكيد هنزور طبالي تاني.