The Definitive Guide to Living in the Capital , Cairo , Egypt

الحلو بيبقى زي الأوكسجين ماينفعش نعيش من غيره، وكل فترة كده جسمنا بيطلب شوية حلو من اللي بيخلي الأنسولين يشتكي، لكن طالما المعدة طلبت هشتكة يبقى لازم نلبي النداء، والمرة دي رحنا بناءً على اقتراح الأصدقاء لمحل “عدنان” واللي بيقول عن نفسه أنه بيحلي الحلو، وهو بيقدم مجموعة حلويات كتير أشهرهم “الرعشة” واللي هنتكلم عنها لأننا جربناها طبعًا.

خلال السطور الجاية هتعرفوا كل حاجة عن عدنان وحلوياته.

خلينا نقول إن عدنان بيحلي الحلو فدي مقولة حقيقية وصدقوا في قولهم، ولكن الحلو محتاج خدمة أحسن من اللي موجودة ومستوى تعامل أرقى وابتسامة حلوة من فريق العمل للعملاء علشان الحلو يبقى أحلى، والمكان مساحته الداخلية والخارجية كويسة والترابيزات والكراسي من الخشب، وهو مقسوم 2 واحد للجلوس والأكل جوا المكان والتاني لأوردرات التيك أواي، وللأسف هما معندهمش دليفري حتى الآن وبننصحهم يتعاقدوا مع شركات توصيل علشان يستاهلوا الناس كلها تدوق من عندهم.

بدأنا تجربتنا بطبق إسمه “رعشة” وسعر الحجم الصغير كان 40 جنيه، وهو عبارة عن طبق أرز باللبن فيه 4 أنواع زبدة “لوتس – فستق – أوريو – بندق”، وده طبق دمار شامل وتقيل جدًا، وكان الأوريو أتقل حاجة فيه ولكن اللوتس كان ممكن يكون بجودة أعلى ولكنه شغال بناءً على سعره الرخيص ونصيحة ممنوع لمرضى السكر نهائي، علشان مجرد ماهتحطوا المعلقة في الطبق مش هتعرفوا تسيبوها.

وكمان جربنا من عندهم طاجن أم علي قشطة بوم بالمكسرات، وسعره 45 جنيه، ولكن زعلنا إن القشطة مكنش ليها طعم، وكمان الطاجن كان للأسف مش طازة زي ما قال لنا الويتر وكان متسخن في المايكروويف وكمان ماكنش سخن للدرجة اللي تخلينا نقول مش مشكلة لا هو كان يدوب دافي من بره وبارد من جوا، والمكسرات طبعًا نية ورغم إننا مش بنحبها كده ولكن فيه ناس كتير بتحبها محمصة فدي مش معضلة وخلينا نقول أن الأفضل دايمًا المكسرات النية.

وأخيرًا كان طاجن البطاطا الفرن وسعرها 18 جنيه، وهو لا كان ساقع ولا كان سخن، فمعرفناش هو بينزل إزاي، ومكنش عليه أي اضافات ولكنه كان مسكر بزيادة، وده أكيد علشان عدنان بيحلي الحلو فحلى البطاطا بزيادة ولكن في المجمل حبيناه ولو رجعنا تاني هنجربه كمان مرة تانية، وطبعًا بعد الأكلة دي شربنا مياه وكان سعرها 5 جنيه، والمياه الغازية عندهم بسعر 9 جنيه بس.

وأخيرًا..

ممكن تكون الأسعار زادت شوية مؤخرًا، وتقدروا تعرفوا أي تحديث في الأسعار وتتعرفوا أكتر عن حلويات عدنان من خلال صفحة الفيسبوك من هنا.