The Definitive Guide to Living in the Capital , Cairo , Egypt

من الحاجات الممتعة في رمضان إننا نلاقي مكان بيعمل سحور على أنغام الموسيقى في القاهرة، والقعدة فيه تكون حلوة ونقدر من خلالها اننا نروق على نفسنا وننبسط بالأجواء رمضانية، وكمان لو المكان ده هادئ وعلى النيل وخدمته كويسة وبيعمل سحور بجودة عالية أكيد هننبسط أكتر، وده اللي لقيناه في “Zi Lounge” المعادي، وفي السطور الجاية هنقول لكم على تفاصيل تجربتنا مع السحور عندهم.

أولًا؛ المكان على النيل وهادئ جدًا وفريق العمل خلية نحل حواليك بيساعدوكم في تلبية طلباتك بسرعة، وعلى الرغم من أن المكان كبير وديكوراته بتكون مختلفة في رمضان عن الأيام العادية ومناسبة لأجواء رمضان أكتر، إلا أننا أكتر حاجة استمتعنا بيها كانت الحفلة الفنية لإن صوت المطربة كان جميل واختيارات الأغاني كان جميل، وهما عندهم كل يوم حفلة موسيقية مختلفة، علشان كده لازم تحجزوا وتسألوا عن برنامج اليوم قبل ما تروحوا.

جربنا من عندهم السحور واللي كان بسعر 220 جنيه للفرد وده كان عبارة عن “فول – طعمية – بطاطس – جبنة – أومليت – وعلبة زبادي ومياه”، وخلينا نقول أن الأكل عظيم، والفول طعمه تحفه، والطعمية مميزة، والأومليت خفيف ومافيهوش زيت كتير، وخلينا نقول إن المكان اللي بيستخدم نوع جبنة محترم وكويس بيبقى كل حاجة فيه جميلة، لأنها تفصيلة حتى لو صغيرة ولكن مهمة جدًا.

وجربنا من عندهم كمان طبق الحلويات المشكلة، وكان سعره 70 جنيه، والكنافة والبسبوسة كانت روعة ولكن لو كان عليهم قشطة كانوا هيبقوا روعة الروعة، أما البقلاوة فكانت كويسة ولكن مش الواو، وكمان المشروبات عندهم حلوة جدًا ورغم تنوع مشروباتنا إلا أن محدش اشتكى من أي حاجة، بالعكس كنا مبسوطين وفرحانين بالقعدة والمغنى والأكل والشرب.

تقدروا تحجزوا من خلال رقم التليفون: 01279755529.

أو من خلال صفحة الفيسبوك من هنا.