The Definitive Guide to Living in the Capital , Cairo , Egypt

تقييم وتجربة: رنا شرف

الفطير المشلتت من الأكلات المميز بيها الشعب المصري وبيحبها بشكل رهيب، ويا سلام بقى لو مع الفطيرة جبنة قريش وعسل ولا جبنة قديمة بالقوطة، هي دي العظمة اللي منعرفش نقولها لا، والنهاردة احنا في كايرو 360 جربنالكم أشهر بتاع فطير اسمه بقى يتردد الفترة اللي فاتت “عم سمير” بتاع الفطير اللي عامل قلق وهنقولكم خلال السطور اللي جاية على تجربتنا كاملة مع المكان.

عم سمير بتاع الفطير له أكتر من فرع ولكن احنا جربنا فرع الدقي، والمكان عبارة عن كرفان كبير دورين، الدور الأول موجود المطعم قدامكم وتقدروا تشوفوا الشيفات وهما بيعملوا الفطير، وقدامهم قعدة بكام ترابيزة، والدور الثاني فيه قعدة بتخليكم تحسوا أنكم قاعدين في البلكونة وبتكشفوا المنطقة كلها.

عم سمير معروف بافتكاساته في الفطير الكتير، ولكن أشهر حاجة عندهم كانت فطيرة الكنافة بالمانجا، وسعرها 150 جنيه وكانت حجم وسط ودي عاوزة شلة ياكلوا مع بعض فيها مش فرد، وطعمها كان خطير، وصوص المانجا والقطع كانت عاملة تيست مميز للفطيرة.

كان مفترض نجرب حاجة كمان من عنده علشان نقدر ننقلكم تجربة أكبر لكن الفطيرة دي مينفعش بعدها تجربة لأي حاجة، ولكن الأيام اللي جاية أكيد هنجرب حاجات تانية وفروع تانية، خاصة أن له فروع في التجمع والمعادي ومدينة نصر.

العنوان: ميد ستريت – الدقي

رقم التليفون: 01200002942

تقدروا تعرفوا أكتر عنهم من خلال صفحة الفيسبوك من هنا.