The Definitive Guide to Living in the Capital , Cairo , Egypt

على مدار السنين اللي فاتت، وبحكم عملنا، شوفنا مطاعم كتير بتبدأ بمستوى جودة عالي جدًا ومع السنين بتقل، إلا أماكن قليلة جدًا هي اللي بتقدر تحافظ على مستواها، ونقدر نقول بمنتهى الثقة إن من الأماكن دي “فات كاو” المعادي.

المنيو زي ما هي ما بين أنواع سندويتشات البرجر والفراخ والمقبلات، اختارنا من قسم برجر اللحم ساندوتش ذا سويس  The swiss بـ 85 جنيه، ومن منيو برجر الدجاج ساندوتش Specials parmesan chicken بنفس السعر، ومن المقبلات بطاطس باللحم المفرومة والجبنة والفاصوليا بـ 35 جنيه.

الأكل نزل لنا بسرعة، وكالعادة الطعم كان رائع وصعب نلاقي فيه غلطة، والأكل بينزل في العلبة المخصوص الخاصة بالمكان، وبتكون عبارة عن صندوق من ورق الكارتون المقوى في مربع صغير بيترفع لفوق فيتفك ويبقى طبق كبير، ولما بتخلص أكل بتقفله بنفس الطريقة وترميه.

ساندوتش Specials Parmesan chicken كان يجنن، الفراخ مستوية مظبوط، وعليها الجبنة عاملة طبقة من الطعم المغري جدًا، كمان حجم الساندوتش كبير وبيشبع جدًا، وكان معاه بطاطس، واللي لازلنا شايفنها كمية بطاطس صغيرة والمفروض تكون أكتر، وده كان سبب من أسباب إننا طلبنا بطاطس Loaded، وهي بطاطس باللحمة المفرومة والصلصة والجبنة والفاصوليا، وكانت متبلة وحلوة جدًا ومش مشطشطة زيادة عن اللزوم، ده غير إن كميتها كبيرة.

أما الساندوتش المفضل بالنسبة لنا دائمًا هو The swiss وكان حجمه كبير ومغري كالعادة والمشروم طالع منه، غير الجبنة والمايونيز، ده غير تتبيلة اللحمة وجودة البرجر اللي ما زالت مستمرة من ساعة ما فات برجر فتح في المعادي.

أكيد هيفضل من الأماكن المفضلة بالنسبة لنا طول ما هو محافظ على جودة الأصناف المميزة اللي بيقدمها.