The Definitive Guide to Living in the Capital , Cairo , Egypt

لو سألتك إيه أكتر حاجة موجودة في القاهرة، أكيد أول إجابة هتيجي على بالك هي المطاعم، بس الفكرة إن مطاعم قليلة اللي تقدر تبهرك بمستواها سواء على مستوى الأكلات المبتكرة أو شكل المكان وأجواءه المبهرة. تجربة كايرو360 الأخيرة مع فوود ريبابليك ماكانتش على المستوى، وأكبر مشكلة قابلتنا إن الأطباق عند المطعم الموجود في كايرو فيستيفال سيتي مستواها مش ثابت.

قررنا نروح نزورهم مرة تانية يمكن حظنا يكون أحسن، وابتدينا الحكاية مع بيف سالاد (65 جنيه)، عبارة عن طبق غويط فيه خس وجرجير وعليهم صوص خل بزيت الزيتون تحفة وعليهم شرائح بيف تندرولين مع شوية سمسم وطماطم شيري وسويت كورن وفاصوليا حمراء. الفكرة هنا إن الصنفين الأخيرين دول كانوا قليلين جدًا، وكان ممكن السلطة تكون أحلى من كده بس المشكلة إن كمية الخضرة فيها أكتر بكتير من باقي المكونات.

الطبق التاني كان بافالو وينجز (44 جنيه) مقرمشة جدًا وعليها صوص باربيكيو مسكر وله نكهة مدخنة، وبيتقدم معاها صوص بلو تشيز. كان نفسنا نقول إن الطبق مش ناقصه حاجة، بس المشكلة إن الفراخ نفسها ماكانتش طازة وده واضح من طعمها.

مشكلة الفراخ ماقدرتش تقلل من حماسنا، ودخلنا بعدها على Chicken Pie (76 جنيه). العجينة المقرمشة المنفوشة كانت محشية فراخ ومشروم طازة وجبنة وصوص كريمة بنكهة القرفة، وعليهم شوية صوص كمان وسبانخ ومكسرات. الكلام على الورق يخليك عايز تأكله من حلاوته، بس الحقيقة طلعت حاجة تانية خالص، والأكلة مالهاش أي طعم ومحتاجة توابل وبهارات كتيرة.

جربنا كمان تايجر فيلي ستيك ساندويتش (72 جنيه). الساندويتش عبارة عن عيش Vienna Bread محشي شرائح ريب-آي بيف لذيذة وطرية مع بصل سوتيه وفلفل ألوان، وبعدين بيرشوا عليهم شوية صوص باربيكيو وفوق كل ده جبنة شيدر سايحة. بصراحة جايزة أحسن إخراج نهديها للساندويتش الرهيب بطعمه الجميل اللي تقدر تعرف منه إمكانيات مطبخ فوود ريبابليك الحقيقية.

نفس الكلام يمشي على الآبل كرامبل (54 جنيه) من منيو الحلو. التارت المسكّر مع عجينة تفاح –اللي كانت مش خفيفة زي المعتاد في النوع ده من الحلويات –ومعاه بولة آيس كريم فانيليا كان مسكر وطعمه روعة. الفتافيت اللذيذة دي كانت مقرمشة وخفيفة، ويا سلام على صوص الكراميل اللي عمل نكهة جميلة من غير ما يطغى على باقي مكونات الطبق. لازم كمان نحييهم على شكل تقديم الطبق نفسه لإن من الصعب تقدم طبق خلطبيطة زي ده بشكل حلو.

تجربتنا عمومًا في فوود ريبابليك لها نقط ضعف ونقط قوة. بعيدًا عن الفيلي ستيك ساندويتش والحلو المميزين، مشكلة باقي الأكل الغلطات الصغيرة اللي بوظت أطباق حلوة جدًا على الورق.