The Definitive Guide to Living in the Capital , Cairo , Egypt

في كايرو 360 جربنا مطعم فيش أند شيبس، المعروف باسم تاني وهو أسماك الشامي، أكتر من مرة، والحقيقة إننا مش عارفين السبب، المكان ده فيه سحر غريب، وقدرة عجيبة على إنه يناديك من تاني لما تحب تهرب لعوالم من الانبساط والسعادة والحنين إلى الماضي.

المكان موجود في وسط البلد، وبالتحديد في شارع البستان بجوار محطة مترو محطة نجيب، وبمجرد ما توصل للشارع مش هتحتاج تسأل على المطعم، هو واضح جدًا ببلكونته الشهيرة اللي كلها ورد وألوان مبهجة.

بمجرد ما بتدخل “فيش أند شيبس” بتحس إنك رجعت لسنين طويلة من زمن القاهرة، وكأنك في مطعم يوناني صاحبته سيدة أجنبية هتقول لك “أنت صاخب المخل”! رغم إن المطعم كل تفصيلة فيه مصرية جدًا، نجوم السينما المصرية في كل مكان على حوائط المطعم، وصوت الأغاني القديمة اللي يجنن العقل، وجمل الفلكلور المصري اللي متعلقة في كل مكان زي “خطوة عزيزة”، ده غير وابور الجاز اللي هيفكرك بحواري القاهرة زمان.

كل مرة بنكون في فيش أند شيبس بننسى الأكل، وبنكتفي بمتعة وبهجة القعدة الجميلة المريحة، لكن بعد شوية من وجودنا في المكان بنفتكر إننا جعانين، وإننا مشتاقين لتجربة السمك العظيم اللي بيعمله المكان بطريقة محترفة.

طلبنا شوربة سي فوود، ودي سعرها 75 جنيه، كل تفصيلة فيها عظيمة، وكل مكوناتها فريش وبتقول إنها معمولة بحب، وطعمها بيخطفك من الدنيا وبيسافر بيك لأعمق بحار على الكوكب.

طلبنا كمان سمك بوري على الفحم، وده سعره 150 جنيه. حقيقي اختراع يستحق تجربوه، الطبق حجمه كبير ويكفي أكتر من فرد، ومكوناته عظيمة.

طلبنا كمان سمك قاروص على الفحم، وده كان اقتراح من موظفة المكان لما سألناها على أجمد طبق ترشحه لينا، والحقيقة كان أعظم ترشيح، وبنحمد ربنا إننا طلبنا رأيها وإلا كان هيفوتنا تجربة طبق مدهش بمكونات طازجة وتوابل تفتح النفس على الحياة.

جربنا كمان السمك البوري المخلي مع الجمبري، وده سعره 150 جنيه، حاجة معمولة باحترافية شديدة، وتخليك تحس بسعادة كبيرة.

المكان بيكون أجمل في وقت متأخر من الليل، بنحس إننا لوحدنا وإننا مالكين المكان.

أما الموظفين الموجودين هناك فبجد يستحقوا التحية، أسلوبهم راقي، وبيعملوك بحب، وتحس إنهم عاوزينك تيجي تاني وتالت ورابع.

شكرًا فيش أند شيبس، انبسطنا جدًا، وهنزوركم تاني قريب.