The Definitive Guide to Living in the Capital , Cairo , Egypt

ونرجع ثاني لساحة الطعام أو الـ Food Court فى مول العرب أكبر مول فيكي يا قاهرة، زي ما ذكرنا لكم قبل كده الاختيارات هنا تحير من كثرها، لكن دائمًا الأماكن اللى بـ تفتح جديد بـ تشد العين أكثر من غيرها، علشان كده شدنا “فيلا – Villa” أو Villa Italian Kitchen بلونه الأحمر بالأخضر فى اللوجو المميز.

المنيو تعتبر صغيرة إلى حد ما فيها كل ما تتخيله من أطباق باستا بالفراخ أو اللحم أو السي فوود، السترومبولى، الخضار المشوية بالطريقة الإيطالية، سلاطات ومشروبات غازية وساندويتشات.

الـ Staff لطاف وهادئين، طلبنا باستا بالجمبري (36 جنيه)، وشريحة بيتزا بالسوسيس معاها خبز بالثوم ومشروب (26 جنيه)، الجميل هنا أن مافيش خدمة ولا ضريبة بـ تضاف، الخدمة مش بطيئة، توقيتها معقول، والطعم؟.. الطعم لطيف، الباستا كانت حلوة مع الجمبري وقطع كاليماري كمان اكتشفناها فى الطبق، الصوص كان مضبوك والطعم لذيذ، البيتزا كمان كانت لطيفة لكنها كالمعتاد تحس أنها شريحة رفيعة من العيش عليها مكونات البيتزا، لكن الحشو كان غني والطعم لطيف.

كان فيه مغريات هناك ثانية زي السترومبولى، بس هل يقدر ينافس “ميركاتو إيطاليانو” الموجود على الجهة الثانية من الفوود كورت ويعملها أفضل منه؟ ده اللى ممكن نكتشفه فى زيارتنا القادمة.

المشروبات هناك اختياراتها مش كثيرة لأنها قاصرة على المشروبات الغازية والحلويات مافيش غير كوكيز هناك، ممم.. المكان لطيف والاختيارات مختلفة لكن ما حصلش بيننا حالة انجذاب.. روحوا يمكن تحسوا بشعور مختلف عننا.