The Definitive Guide to Living in the Capital , Cairo , Egypt

خلال الثلاث سنين اللي فاتوا قدرت 6 أكتوبر والشيخ زايد يلفتوا انتباه كتير من الأكيلة والناس اللي عايزة أماكن خروج جامدة، وأكبر ميزة بيوفروها للقاهراوية إنهم ينسوا شوية زحمة الشوارع والدوشة ويطلعوا على مكان هادي.

كابيتال جريل اختار مكان ممتاز في ريفيوليت بيطل على النافورة مع تصميم كلاسيكي للمكان يتميز بالشياكة والفخامة.

بعد استقبال هايل من الجرسون اللي وصلنا لترابيزتنا، قدموا لنا عيش سخن طازة مع صوص طعمه حلو واضح فيه نكهة المسطردة مع شوية توابل وخل، ويا سلام لما تغمس فيه العيش الطري وتشرب عصير التفاح بطعمه المسكر.  

بعد حوالي نص ساعة وصل طبق المقبلات تشيلي تشيز بوتاتوز (25 جنيه) وده عبارة عن قطع بطاطس متغطية جبنة ولحمة مفرومة. جايز في شوية من البطاطس ماكانتش مستوية كويس وتقطيعها كان صعب شوية بس كميتها كانت بسيطة، وكمان صوص التشيلي كان قوي فعمل توازن في طعم الأكل.

بعدها وصل الشريمب كنافة في كاس، عبارة عن خمس قطع جمبري وسط محشيين في كنافة. المشكلة إن الكنافة كانت عاملة زي البقسماط اللي بنقلي بيه الأكل ومش الكنافة الشعر. الطويلة اللي كلنا عارفينها.

أول طبق رئيسي كان تشيكن كوردون بلو (75 جنيه) وده عبارة عن أربع قطع صدور فراخ محشيين بيف مدخن ومشروم وجبنة وعليهم جبنة، وبيتقدم مع الطبق باستا بنّا بالصوص الأبيض.

بصراحة الفراخ كان طعمها تحفة والبيف المدخن مع المشروم بطعمه المملح والجبنة اللذيذة عملوا أبعاد جديدة لطعم الفراخ، وكل قطمة أحلى من اللي قبلها. أما الباستا فكانت مستوية كويس جدًا، بس محتاجة صوص أبيض زيادة.

نروح لفيليه كابيتال جريل (115 جنيه) اللي بيتكون من ثلاث قطع فيليه مدورة معمولين في طاسة سخنة مع صوصات  بلو تشيز ومشروم بني ومشروم أبيض، واخترنا الأطباق الجانبية رز كابيتال جريل وبطاطس جراتان مهروسة بيتقدموا كل واحد منهم في طبق.

كل قطعة فيليه محطوط عليها صوص مختلف، وكل صوص بيعمل طعم مختلف للبيف واللحمة نفسها طعمها هايل وكمان علامات الشوي اللي تفتح النفس وملمس اللحمة نفسها يعرفوك دليل على الجودة العالية.

قوام البطاطس الجراتان المهروسة كان سميك وعليها جبنة، أما رز كابيتال جريل فبيتحضر بتوابل معينة عملتله شكل وطعم مميزين.

نروح على الحلو اللي كان كابيتال جريل تشيز (37 جنيه)، وده طبق كبير فيه ثلاث قطع تشيز كيك صغيرين عليهم صوصات مختلفة: كراميل وشوكولاتة وفراولة. سيبك إن الكيك نفسها كانت دافية من تحت بس الطعم المسكر اللذيذ حكاية.

تجربتنا في كابيتال جريل كانت مرضية جدًا؛ المكان لطيف لو المطلوب أكلة حلوة في جو هادي مريح وطبعًا هايل للمناسبات الخاصة أو عشاء عمل، المهم تعرفوا إن مافيش أي حاجة هناك مختلفة أو مميزة. المكان زيه زي ستيك آوت وسبيكترا،  ومنيوهاتهم قريبة من بعض، ويعتبر اختيار آمن.