The Definitive Guide to Living in the Capital , Cairo , Egypt

رنا شرف

لو هنختصر “كارلوس” في جملة، فهي إنه مطعم مميز بيقدم أكل من مطابخ مختلفة، خصوصًا المطبخ اللبناني، بجودة عالية، والمكان نفسه مش تقليدي، وبيتميز بالقعدة المريحة.

ديكورات “كارلوس” مميزة، وهتحس أنك في قصر تاريخي، علشان كده بنشوف إن المكان هيعجب كل الناس اللي بتحب التاريخ، خصوصًا إن المبنى نفسه قديم وكان في الأصل قصر.

أول ما هتدخل المكان هتحس بسحر التاريخ، مثلًا هتشوف عربية حمرا من طراز قديم في مدخل المطعم، وكمان تماثيل إغريقية، ده غير صور فنانين من الزمن الجميل.

نتكلم بقي عن الأطباق؛ أول طبق اخترناه كان سلطة الراهب ودي طبعًا من السلاطات اللبنانية المشهورة، قريبة من البابا غنوج بس بشكل مختلف شوية، بيميزها الباذنجان المشوي والفلفل الملون، ودبس الرمان فيها مظبوط جدًا، وطعمها فعلًا جامد، وسعرها 65 جنيه.

طلبنا كمان من المقبلات سلاطة البطاطس الحارة، ودي عبارة عن مكعبات بطاطس صغيرة محمرة بالفلفل الحار والثوم والكزبرة الخضرا. وكانت لذيذة جدًا واتمنينا لو كانت الكمية أكبر شوية في الطبق، وسعرها 78 جنيه.

جربنا كمان النقانق اللبناني، وهي عبارة عن سجق مقلي في الزيت مع دبس الرمان والطماطم والفلفل، وسعره 134 جنيه.

نيجي بقي للطبق النجم اللي لو رحت كارلوس لازم تجربه، بنتكلم هنا عن طاجن الأرز المعمر بالحمام، والطاجن ده بيرجعنا لأكل زمان اللي كان بيتعمل بمزاج عالي، والكمية حلوة والأرز جميل ومستوي صح، والحمام متقطع قطع صغيرة في الطاجن وده بيخليه سهل الأكل، ودي ميزة كبيرة الحقيقة. بصراحة طبق مميز جدًا ولازم تجربوه لو روحتم كارلوس، وده سعره 270 جنيه.

قلنا كمان نجرب المشاوي، فطلبنا كفتة مشوية مع بطاطس مهروسة، عجبتنا الكفتة المشوية جدًا، وكانت معمولة صح ومستوية على المظبوط وتوابلها رائعة، لكن البطاطس المهروسة كانت محتاجة شوية توابل وممكن لو بقدونس معها كانت هتكون أحلي، والطبق كان سعره 183 جنيه.

طلبنا في الآخر عصير ليمون ونعناع، وكان فريش ولذيذ ومن غير إضافات صناعية، ودي بالنسبة لنا أحلي حاجة، وسعره 50 جنيه.

 في المجمل كارلوس فرع مصر الجديدة  مكان هيعجب عشاق الجو الكلاسيك والفخامة، وإحنا أكيد هنكرر تجربتنا هناك، لأن الجو مبهر وعجبنا.

كارلوس موجود في 58 شارع بيروت -الكوربة – مصر الجديدة.