The Definitive Guide to Living in the Capital , Cairo , Egypt

وإحنا بنقلب وندور على مطاعم جديدة في القاهرة، وقعنا في مطعم اسمه “كاندي تشيكن” في الهرم، عرفنا إن فريق العمل  بتاعه من الصم والبكم. فقولنا نروح ونخوض تجربة الأكل هناك. خاصة إنها تجربة إنسانية مختلفة، خصوصًا إننا واثقين من قدرات وتميز مجتمع الصم والبكم في مصر، في السطور الجاية هننقل لكم تجربتنا هناك.

بدايةً كده أول ما وصلنا ودخلنا المطعم، لفت انتباهنا ديكور المكان من جوه، رغم مساحته الصغيرة. ديكور جميل وكله ألوان مبهجة. حتى الكراسي بتاعة المكان ملونة بألوان مختلفة. وكمان الحوائط عليها أشكال ورسومات جميلة. وكلها من وحي الوجبة الأساسية للمكان، اللي هي الفراخ أكيد.

طبعًا وإحنا داخلين كنا شايلين هم إزاي هنتعامل مع الاستاف جوه؟ إزاي هنطلب الأكل بتفاصيل زي حراق أو عادي؟ ساندوتش لوحده ولا معاه بطاطس؟ كل الأسئلة اللي ممكن تيجي في دماغ أي حد، في موقف زي ده. بس قولنا هندخل وعلى البركة زي ما تيجي.

دخلنا والصراحة اتفاجأنا بالمعاملة الممتازة من اللي شغالين، حالة كده من الحب سيطرت على الأجواء. والكل بيستقبلك بضحكة وإبتسامة جميلة. وصلنا على الكاونتر وواحد من فريق العمل شاور لنا على المنيو. وشاورلنا كده بإيده على نفسه وكل اللي شغالين، بحركة تفهمنا إن الكل من الصم والبكم وماحدش بيتكلم.

المفاجأة بقى إننا ماتعبناش واحنا بنختار الأكل. اللي واقف على الكاونتر كان هو اللي بيساعد الناس إزاي تطلب. وبشوية إشارات من الإيد، على حبة منه وهو بيقرأ الشفايف، طلبنا اللي إحنا محتاجينه في دقائق.

اخترنا وجبة سوبر كاندي كومبو (55 جنيه)، ودي كان فيها 3 قطع فراخ حجمهم متوسط. وطعم الفراخ كان رائع هي والبطاطس. لكن سلطة الكول سلو مش قد كده.

طلبنا كمان وجبة كريسبي ستريبس (55 جنيه)، ودي كان فيها 5 قطع فراخ صغيرين. وماتختلفش عن طعم الوجبة الأولى غير إنها حراقة للناس اللي بتحب الأكل حراق. وطبعًا ممكن تطلبها عادية مش حراقة.

بصراحة الوجبة ماكنتش تشبع أوي، وخصوصًا إننا كنا جعانين. فطلبنا سندوتش برجر لحمة جريل (20 جنيه). وكان طعمه روعة. ومعاه واحد سوبر سوبريم وسط (36 جنيه)، وطعمه مايقلش عن البرجر. خصوصًا مع شرائح الجبنة اللي مالية السندوتش.

ومن الحاجات اللي لفتت انتباهنا برضه في المكان، إنهم عاملين على الحيطة أشكال الحروف بلغة الصم والبكم. يعني تقدر تسلي نفسك وأنت مستني الأكل وتتعلم حاجة جديدة. ده غير نظافة المكان الممتازة، وأضوائه الهادية اللي بتحسسك بالراحة.

فعلًا مطعم كاندي تشيكن مش بس مكان بتاكل فيه، ده حالة فرحة وسعادة بتعشيها مع استاف محترف، وكله ود وترحاب.