The Definitive Guide to Living in the Capital , Cairo , Egypt

رنا شرف

في المعادي، وتحديدًا في شارع 213 بدجلة، فيه مطعم مميز اسمه “كايرو كيتشين – Cairo Kitchen”، كل الأطباق اللي بيقدمها مصرية بنسبة 100%. قررنا نزور المطعم علشان نجرب أكله.. خلونا نقول لكم التفاصيل في السطور الجاية.

المنيو في “كايرو كيتشين” مصري جدًا، مش بس الأطباق الرئيسية والمقبلات، حتى الحلويات كمان.

المطعم بيقدم تيمة لكل يوم من أيام الأسبوع، يعني يوم الأحد مثلًا بيقدموا كفتة دوواد باشا مع أرز بالشعرية، ويوم السبت شركسية، وهكذا.

المطعم صغير جدًا من حيث الحجم، يعني فيه 3 ترابيزات فقط، وبيعتمد أكثر على خدمة التوصيل للمنازل، لكن رغم صغر حجمه، حبينا المكان وحسينا إنه مصري بجد ومليان مشاعر حنين وبيتميز بالهدوء، وكأنك قاعد في بيتك.

الترابيزات والكراسي بتشبه الموجودة في المقاهي الشعبية، وده خلانا نحس بجو شعبي مناسب جدًا للأكل المصري الأصلي.

في “كايرو كيتشين” مسموح لك تدخل المطبخ وتطلب الأكل اللي يعجبك وأنت واقف، وهتشوف بنفسك الأكل وهو بيتحضر.

نيجي بقي للأكل والأطباق..

طلبنا من المقبلات بطاطس بالبهارات، ودي عبارة عن بطاطس مسلوقة بالشطة، الطبق كان حلو والكمية كبيرة، والسعر38 جنيه.

وأول صنف رئيسي جربناه كان مكرونة بالبشاميل، ودي سعرها 77 جنيه، وكانت حلوة رغم أنها دسمة شوية، وحسينا إن كمية اللحم المفروم قليلة شوية.

تاني صنف جربناه كان رقاق باللحمة المفرومة، وده عجبنا قوي خاصةً إنه كان خفيف، وسعره مناسب 62 جنيه.

طلبنا منهم برضه فريك بكبد الفراخ، وكان حلو قوي، وطريقة التقديم مميزة، بيقدم لك الكبدة بالصوص لوحدها والفريك لوحده، والسعر 115 جنيه.

في المجمل التجربة حلوة، وحسينا إن الأسعار معقولة مقارنة بالأسعار في المطاعم المشابهة، والجودة كانت عالية، والخدمة مميزة.

تقدروا تتعرفوا عليهم أكثر من خلال صفحتهم على فيسبوك.