The Definitive Guide to Living in the Capital , Cairo , Egypt

مطاعم
كبدة البرنس

كبدة البرنس: رجوع غير موفق لملك الكبدة في مصر

تم التقييم بواسطة
Mohammed Sabry
قيم
قيم الآن
كبدة البرنس: رجوع غير موفق لملك الكبدة في مصر

طبعًا كلنا عارفين مطعم كبدة البرنس، أو زي ما ناس كتير بتقول عليه، البرنس بتاع إمبابة. المطعم عمل افتتاح كبير من فترة بعد غياب طويل. فقررنا في كايرو 360 نروح المطعم المشهور ونجرب الأكل بتاعه، ونشوف هل الغياب أثر عليه ولا لسه زي ما هو برنس؟

أول ما وصلنا لقينا المشهد اللي كنا متوقعينه طبعًا، الدنيا زحمة جدًا. ناس كتير قاعدة بتاكل، وناس كتير واقفة مستنية مكان يفضى علشان تاكل. روحنا للشخص المسؤول عن تنظيم الناس اللي بتيجي، وكتب اسم واحد مننا علشان ناخد دورنا في الانتظار. ولما جه دورنا شاور لنا علشان ندخل في المكان اللي فضي جوة المطعم. ويمكن حظنا كان حلو ومافضلناش مستنين كتير.

دخلنا المطعم وقعدنا، وعلى طول واحد من اللي شغالين جاب لنا المنيو علشان نختار منها. طلبنا طاجن فريك باللحمة (50 جنيه). كان حجمه إلى حد ما صغير. بس قولنا يمكن الطعم يبهرنا. لكن للأسف طعمه ماكنش حلو خالص. ويمكن اللي سهل علينا أكله هي قطع اللحمة اللي كانت فيه، وكمان ماقدرناش نكمله.

طلبنا كمان طاجن ملوخية سادة (30 جنيه)، وقولنا دي بقى أهم حاجة بيتميز بها البرنس. لكن المفاجأة إن الملوخية كانت أوحش حاجة في الأكل. وماكناش مصدقين إن دي ملوخية البرنس اللي الناس بتيجي علشانها مخصوص من كل مكان.

نيجي بقى لجزء الكبدة واللحوم، ودي لقينا أسعارها غالية جدًا بالنسبة للكميات اللي بتتقدم. طلبنا نص كبدة مشكل (90 جنيه). المفروض إنها مشكل والراجل قال لنا على كذا صنف فيها، لكن ماجاش فيها غير كبدة وكفتة. بس كان طعمها حلو. وأخدنا كمان نص كيلو لحمة محمرة (90 جنيه). ويمكن دي كانت أحلى حاجة في الأكلة كلها. اللحمة معمولة بالتوابل والبصل، وعليها صوص روعة. ويمكن ده اللي أكلناه بالعيش أكتر من الملوخية.

وقولنا نجرب السجق، وطلبنا ربع كيلو سجق جريل (55 جنيه). وده برضه كان طعمه كويس، بس مش لدرجة السعر اللي محطوط عليه.

في الحقيقة كبده البرنس خيب ظننا، بعد ما كنا رايحين ومتعشمين في الطعم اللي اتعودنا عليه. خصوصًا بعد الدعاية الكبيرة والافتتاح اللي عمله. لكن كل آمالنا اختفت وإحنا هناك. ده بالإضافة لأسعاره الغالية جدًا اللي مش مناسبة لكميات الأكل اللي بيقدمها.

نصيحة 360

بعد ما تخلصوا أكل في البرنس لازم تاكلوا الحلو من المالكي اللي جنبه على طول. خصوصًا أم علي. طعمها ماحصلش.

أحسن حاجة

الخدمة هناك كويسة جدًا، والأكل مش بيتأخر.

أسوأ حاجة

لما طلبنا كبدة جملي كانت خلصت، رغم إننا كنا رايحين في وقت مش متأخر.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح