The Definitive Guide to Living in the Capital , Cairo , Egypt

مطاعم
كريف – Crave

كريف: مطعم تجربته مؤلمة في الزمالك

  • 22أ شارع الدكتور طه حسين
  • عالمي
  • 11 صباحاً - 2 صباحاً -
تم التقييم بواسطة
Angie El Batrawy
قيم
قيم الآن
كريف: مطعم تجربته مؤلمة في الزمالك

في يوم كنا خارجين وبـ نفكر إيه أنسب مكان نروح نستمتع
بأكل حلو وفي نفس الوقت نخلص حبة شغل علينا.. قعدنا ندور لحد ما جاءت لنا فكرة
نروح مطعم «كريف – Crave» في الزمالك خصوصًا أن بعضنا كان
جربه قبل كده وكان تجربة جيدة جدًا.

للأسف مش دائمًا التوقعات بـ تطلع
صحيحة ولا التجارب السابقة بـ تدوم، في اليوم ده المكان كان زحمة جدًا ومليان دخان،
والجرسون قعد ماشي بنا لحد ما دخلنا فى طرقة فى آخر المطعم جوه خالص وطلعت
للمدخنين، لكن وعدنا أننا ننتقل لمكان غير المدخنين بعد 10 دقائق.

القعدة اللي جوه منعزلة تمامًا عن جو الكافيه، حتى
الديكورات مش مكملة نفس الروح في المكان ده إلا لون الحائط وشكل الكنب، الديكور
“اللي بره” عبارة عن قعدتين واحدة كنب بترابيزة منخفضة، والثاني كراسي
بترابيزات عالية، الكنب لونه مزيج بين بني وبيج وكحلي، أو بني وبيج وموف ومليان
مخدات، والترابيزات عليها مفرشين جلد محطوطين بالطول وآخرهم شمواه، وبـ يفصل كل
القعدات بارافانات زجاج مخربش عليه رسوم جرافيك بسيطة وشيك جدًا من نفس لون
الديكور، فيه بار كبير واقفة فيه الجرسونات، وفي المدخل طرقة كبيرة فاضية مافيش
فيها غير مكتبة صغيرة!

المطعم بـ يقدم أصناف كثيرة منها رافيولى
(وهى نوع عجينة مكرونة للي ما يعرفهاش)، وشوربة، وساندويتشات، وأطباق رئيسية (لحم
أو فراخ)، وتحلية، ومشروبات، طلبنا تشيكن ليمون ديل صوص (45.95 جنيه) وكانت الفراخ
طرية ومستوية حلو وصوص الليمون جامد أوي وطعمه واضح فى الفراخ، وكمان جربنا كوردون
روز (49.95 جنيه) وهو عبارة عن فراخ عليها صوص عليه خضار مقطع صغير قوي ومحشية من
جوه سلامي مقطع وحاجات ثانية بس كان الصوص بالفراخ حلوين وطعمهم مختلف، وطبعًا
الأطباق كالمعتاد بـ ينزل معاها اختيارين من أرز، وخضار سوتيه، وبطاطس محمرة أو
مهروسة.

بعد الأكل قلنا نريح شوية ونقعد
نشتغل بس للأسف المفاجأة ما لقيناش أكباس كهرباء علشان نوصل اللابتوب، فسألنا
الجرسون –اللي كان واعدنا أننا ننتقل بعد 10 دقائق- لمكان غير المدخنين، المهم
انتهى بنا الحال أنهم جابوا لنا كراسي وترابيزة عالية على بُعد خطوتين من الكنبة
اللى كنا قاعدين عليها وكملنا اليوم كله فى المكان المنعزل ده وسط الدخان مع وعد
أننا ننتقل برضه!

بعد شوية كده قلنا نحلي بميلك شيك
شوكولاته (17.95 جنيه) وكان غني بالشوكولاته وقوامه مظبوط، وكمان جربنا فوج شيك
(بنفس السعر) وهو عبارة عن آيس كريم مخفوق وعليه حبة مكسرات صغيرة من فوق وكان
طعمه كويس، بس مش بنفس حلاوة ميلك شيك الشوكولاته.

الحد الأدنى للطلبات 80 جنيه، بس بعد التجربة اللي مرينا
بها –من رأينا- أن المبلغ ده كبير جدًا على الخدمة اللي بتتقدم فيه وعلى طبيعته
كمكان.

زيارتنا اللى استمرت ما يقرب من 3 ساعات في مكان ما حسيناش
فيه أننا خرجنا في مكان جديد، فى الآخر هي تجربة ما طلعناش منها غير بأكل حلو ورائحة
الدخان اللي كانت مالية هدومنا!

نصيحة 360

ما تروحش الكافيه ده لو ناوي تركز في شغل، إلى  جانب مش هتلاقي أكباس كهرباء كافية للابتوب، إلى جانب أن مافيش إنترنت.

أحسن حاجة

الأطباق الرئيسية حلوة والميلك شيك الشوكولاته.

أسوأ حاجة

رائحة الدخان – المكان المنعزل اللي في آخر الكافيه.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح