The Definitive Guide to Living in the Capital , Cairo , Egypt

أكلة الكشري ما يتقالش فيها كلام كثير، يا إما حلوة وتملأ البطن والدماغ يا
إما أي كلام وتعرف أنك مش هـ تأكل عند الراجل ده ثاني، وغالبًا بـ تبقى دخلت المحل
ده مضطر أو كنت في حتة ما تعرفهاش وعاوز تأكل كشري على أساس أنه الأكلة الوحيدة
اللي مخاطرها محدودة علشان مافيهاش لحوم.

حصل موقف مشابه معانا وإحنا معديين من ميدان الجيزة في ساعة ذروة والعربيات
فوق بعض، وعرفنا أننا مش هـ نروح قبل ساعتين بالمنظر ده، فـ قررنا نأخذ تصبيرة
ودخلنا محل لفت نظرنا وعامل أضواء كأنه فرح اسمه «كشري أبو عماد» وهو في ميدان
الجيزة نفسه وملاصق لمطعم «جاد» الشهير.

المطعم له بوابتين؛ واحدة أمامية بـ تطل على الميدان وواحدة في نهاية المحل
بـ تطل على شارع خلفي، والمساحة من الداخل معقولة، فيه حوالي 12 ترابيزة لكن وقت
ما رحنا المكان كان مليان على الآخر وده مؤشر كويس لمحلات الكشري. ممكن الناس تقعد
على نفس الترابيزة مع ناس ما تعرفهاش، وده بـ يزيد فرص التواصل الاجتماعي بين
الناس، وبـ يخلق طاقة إيجابية في المكان وتظهر بقى مواقف الجدعنة والشهامة والناس
تقعد تعزم على بعض علشان تقعد والمنظر بـ يبقى ظريف جدًا.

المهم لاقينا ترابيزة فاضية ونظرنا للمنيو المتعلق على الحائط، وكان عبارة
عن كشري بأحجام مختلفة بأسعار 5 و7 و9 جنيه، أسماء الأطباق طبعًا زي أي محل كشري
بـ يحترم نفسه؛ لوكس وسوبر وأبو عماد، وأي إضافة حمص أو عدس أو تقلية بجنيه واحد،
ومنيو ثاني للطواجن باللحم المفروم أو الكبدة بأسعار 7 و9 جنيه برضه، وحلويات أرز باللبن بالمكسرات وسادة وأرز باللبن في الفرن.

سألنا الجرسون إذا كان ممكن يعمل لنا طبق كشري بالكبدة، على أساس أن المحل
بـ يعمل طواجن فيها كبدة بالفعل، قال لنا أنه ممكن طبعًا وهـ يبقى بـ 7 أو 9 جنيه
حسب الحجم. الحقيقة أن الكشري بالكبدة أكلة مرتبطة في ذهننا بمطاعم معينة في الإسكندرية
لكن اكتشفنا كام محل بـ يعمل الطبق ده هنا في القاهرة، وفرحنا أن «أبو عماد» واحد
منهم.

الأكل نزل قدامنا بسرعة جدًا كعادة محلات الكشري المحترفة، والكشري لوحده
كان رائع والمكونات بتاعته طازجة، لكن الكشري بالكبدة خيب ظننا لأن الكبدة كانت
عبارة عن فتافيت كبدة إسكندراني، ومش فريش كفاية، لكن ما كانش وحش لدرجة أنه ما
يتاكلش، مع الدقة والصلصلة كل حاجة ممكن تبقى حلوة في محل الكشري. طلبنا بعد الأكل
أرز باللبن (2 جنيه) وكان حلو وخفيف زي أي محل كشري ما بـ يعمله. شبعنا من الطبق
وما فكرناش نطلب كمالة، لكن قررنا أن المكان ده هـ يستضيفنا كثير في كل مرة نكون
واقفين في زحمة ميدان الجيزة وعاوزين نضيع شوية وقت في أكلة مفيدة، لكن مش هـ نخرج
بره طبق الكشري التقليدي.