The Definitive Guide to Living in the Capital , Cairo , Egypt

مافيش شك أن هليوبوليس من أهم المناطق في القاهرة اللي بتقدم كل يوم مطاعم وكافيهات جديدة بجانب 6 أكتوبر والقاهرة الجديدة، طلعنا زيارة لمطعم وكافيه "كوكو – Coco" الموجود في ألماظة جنب سوبر ماركت أوسكار والحقيقة أنه ما قدرش يبهرنا خالص.

منطقة الأوت دور في كوكو صغيرة وهادئة، أما ديكورات المكان نفسه فبتجمع بين اللمسة الكلاسيكية والمودرن، بكراسي وكنب مريح باللون الأخضر وكراسي بيدين مخططة بالأبيض والأسود ونجف بكريستالات صغيرة.

بعد ما استقرينا في أماكننا داخل كوكو، قدموا لنا منيوهين مغلفين فيهم اختيارات هايلة منها ذيل أستاكوزا مشوي Broiled Lobster Tail بـ (233 جنيه) وسلامون فارفالى Salmon Farfalle بـ (70 جنيه)، بعد تفكير عميق قررنا نطلب كوردون بلو مشوي بصوص مسطردة (73 جنيه) وسي فوود فيتوتشيني (61 جنيه).

ندخل في الموضوع ونتكلم على الكوردون بلو المكون من قطعتين صدور فراخ طرية حجمهم متوسط وعليهم صوص هوني مسطرد –مش صوص مسطردة زي ما قالوا– لكن مافيش أي نوع من أنواع الشواء ظهر على الفراخ، الغريب أنها ما كانتش مقلية حتى، اللي وصل لنا في الحقيقة كان فراخ لونها أبيض ونرجوكم ما تسألوناش عملوها إزاي، النتيجة كانت فراخ عديمة الطعم ولا النكهة ومحشية قطعة مشروم واحدة وقطع لحم مدخن صغيرة ومافيش وجود لنكهة الجبنة، الجانب الإيجابي الوحيد في الطبق كان البطاطس المحمرة بتتبيلتها الرائعة والخضار الطازج المعمول بالزبدة وزيت الزيتون.

المعاناة استمرت مع الطبق الثاني، السي فوود فيتوتشيني المكونة من جمبري ولحم كابوريا وكاليماري مع المكرونة كانت مستوية كويس، بس المشكلة كانت في الصوص الأبيض، وزي ما قولنا قبل كده على مشكلة طعم الجبنة في الكوردون بلو، طعم المكرونة كان ضعيف وقوامها عامل زي الشوربة.

بعد ما خلصنا الأكل، كان نفسنا الموضوع يكون أحسن مع الحلو، وعرفنا من الجرسون أنه مش موجود في المنيو، الموجود وقتها كان أطباق حلو تقليدية منها براونيز وشوكليت لافا كيك، بس إحنا طلبنا تشيز كيك (34 جنيه)، والمفاجأة أنها طلعت مش تشيز كيك خالص واللي وصل لنا كانت حاجة أقرب للتشيز مادنيس بتاعة سبيكترا.

على العموم، الكيكة كانت عبارة عن طبقة رفيعة من البسكويت والجبنة، ووسطهم كمية آيس كريم كبيرة، بس مافيش كلام أن صوص الفراولة مع طبقة البسكويت والآيس كريم فانيليا المنعش وشوية الجبنة عملوا طعم رائع يستحق التقدير. هضمنا كل اللي فات بشيشة كيوي على مانجو هايلة وفضلت مكملة معانا طوال الوقت.

رغم أن نهاية اليوم كانت لطيفة، بس مشينا من هناك وكل اللي بيدور في عقلنا إزاي المطعم هـ يقدر يستمر وسط المنافسة القوية الموجودة، لما تشوف المنيو هتفتكر أنك على موعد مع أكلة هايلة لكن الحقيقة حاجة ثانية خالص، المشكلة الحقيقية كانت في تحضير الأكل ودي حاجة أكيد لها حل.