The Definitive Guide to Living in the Capital , Cairo , Egypt

وسط منافسة شرسة بـ تشهدها مطاعم القاهرة، شارع 9 في المعادي يعتبر من أصعب المناطق اللي يقدر فيها مطعم يكبر وينافس. جزء من المشكلة سببه الإيجارات المولعة، وطبعًا المشكلة الأساسية أن مهما كان نوع الأكل، أكيد هـ تلاقى مطعم ثانى جنبه بـ يقدم نفس الكلام.

"لان يوان – Lan Yuan" موجود بقى له فترة فى المعادي، صحيح الأكل الصيني فى مصر عادة تكلفته بـ تكون زيادة عن المفروض، لكن لان يوان بـ يهتم بجودة الأكل والسعر أكثر من تقديم "تجربة" مختلفة.

المهم، المسافة من لان يوان للمترو اللى بـ يهز العمارة بأكملها مش أكثر من 5 متر. المطعم عادي جدًا جدًا، مافيش أي نوع من الأجواء، والفضل يرجع للديكورات القديمة والأثاث العتيق.

رغم أننا شوفنا مطاعم كثيرة انهارت بسبب أجوائها العادية، لكن لان يوان قدر يخرج من المعادلة، يبقى أكيد السر هنا حاجة لها علاقة بالأكل، بعد رحلة استكشاف فى المنيو الورقية، ما قدرناش نطلع بحاجة مميزة، فاستقرينا على الأطباق الآسيوية التقليدية.

طلبنا من فواتح الشهية Fried Won Tons (11 جنيه) وChicken Satay (23.75 جنيه). أما بالنسبة للأطباق الرئيسية، طبق من شرائح البيف بصوص المحار (45 جنيه) وكريسبى تشيكن بالصوص البني (45 جنيه)، مع إضافة أرز مقلي بالبيض والخضروات (13 جنيه) ونودلز مقلية بالخضروات (17.99 جنيه).

بعد شوية، وصلت فواتح الشهية، كمية Won Tons كانت كبيرة ومقلية لدرجة قرمشة رائعة. التشيكن ساتاي صحيح كانت طرية وعصارية، لكن صدمتنا بنكهة الكاري القوية.

البيف بصوص المحار كان موضوع مختلف، قُدم معاه خضروات مقطعة وصوص محار لذيذ، ورغم أن اللحم كان ناشف شوية، لكن الموضوع ده كان فى صالح الطبق، الوجبة اللذيذة اكتملت مع الأرز المقلي المنفوش.

نفس الكلام بالنسبة للكريسبي تشيكن وكميته الكبيرة، وعليه صوصنا المفضل يومها -الصوص البني- وكمان النودلز قدرت تضيف له الكثير، ورغم أنها كانت جافة شوية، لكن برضه تعتبر وجبة ممتازة.

المفاجأة الحقيقية مش بس أكل لان يوان الأحسن بمراحل من المكان، أسعار الأكل كانت مدهشة، اليومين دول عاملين تخفيض 12%، وشيكنا بعد الخصم كان عامل أكثر من 150 جنيه بحاجة بسيطة، ودى نقطة تتحسب لصالح لان يوان.