The Definitive Guide to Living in the Capital , Cairo , Egypt

مش عارفين ليه كل لما نسمع إن مطعم عمل منيو جديدة بفكرة معينة بنكون متشوقين جدًا نشوفها ونجربها، يمكن السبب إننا بنقدر نحكم على قوة المطبخ ومستوى ابتكارهم وصل لفين.

الحالة دي حصلت لنا بقوة لما سمعنا إن مطعم لا جورمانديز في فور سيزونز فيرست ريزيدنس، أعلن عن منيو على شرف المانجو، أصل خلينا صرحاء شوية، مين ما بيحبش المانجو؟

كنا رايحين في الأول وفاكرينها سيت منيو زي معظم الحالات دي. بس أطباق لا جورمانديز الجديدة طلعت كتيرة جدًا. يعني مثلًا عاملين طبقين شوربة وطبقين سلطة وطبق سوشي رول، وطبق مقبلات سخن وطبقين رئيسيين وثلاثة أنواع حلويات. شوربة الأفوكادو شدت انتباهنا ومعاها كنافة بالمانجو، بس للأسف مكانوش متوفرين يومها.

قررنا مانطلبش شوربة ونجرب سلطة بافالو موتزاريلا (150 جنيه). السلطة طلعت عبارة عن جرجير وشرائح طماطم شيري، وقطع بافالو موتزاريلا صغيرة وشرائح مانجو، وعليهم دريسينج كريمي سبايسي، مع رشة خلة بلسمي يعمل نكهة مززة. وكمان ثلاثة أسياخ فيهم مكعبات مانجو وموتزاريلا وطماطم شيري وشرائح أفوكادو. ممكن نقول إن طعم الطبق كان قريب لسلطة كابريس مززة شوية، بس المانجو قللت من الطعم اللاذع. وكمان الدريسينج السبايسي عمل دويتو هايل معاها.

تعالوا معانا نتكلم شوية عن الأطباق الرئيسية ونبدأ مع فراخ مشوية (150 جنيه) عبارة عن قطعة فراخ مشوية طرية ومتبلة كويس. وكمان تحتها كينوا وصوص كاري طعمهم هايل. وعليها شوية فاصوليا خضراء ملهومش أي لزوم في الطبق بصراحة. وبينزل معاه صوص مانجو – عبارة عن فلفل أحمر وبصل ومكعبات مانجو وكزبرة – مسكر وطعمه جميل. الجميل في الطبق إن صوص المانجو قلل من صوص الكاري المعروف بنكهته القوية، والاتنين مع بعض عملوا شغل عالي مع الفراخ المشوية. يمكن المشكلة كانت في شكل الأكل نفسه وطريقة تقديمه. بس عمومًا لازم نقول إنه من أحسن الأطباق اللي جربناها من فترة.

بعدها دخلنا على Maple Glazed Salmon ثمنه (350 جنيه) وده عليه كلام. من مميزاته مثلًا إن شكل الطبق كان حلو. أما من ناحية الطعم فالصويا و maple عملوا نكهة مسكرة ولاذعة رهيبة. وكمان المانجو أضافت كتير لطعم الأكلة. أما المشاكل اللي قابلتنا مثلًا إن تقطيع السالمون لقطع صغيرة خلاه ناشف جدًا، وكفيل إنه يبوظ الطبق كله. وكمان الكزبرة اللي على المانجو مكانش لها أي تأثير.

من الأطباق اللي طلبناها شريمب تمبورا سوشي رول (290 جنيه). الأوراماكي رول كان محشي شريمب تمبورا وأفواكادو وشوية جبنة بيضاء، وبعدين بيحطوا عليه شرائح مانجو طازة ورشة صوص مانجو بالثوم سبايسي ثقيل. والصوص ده فعلًا كان نجم الطبق من غير كلام. الرز كمان كان خفيف جدًا والجبنة البيضاء أضافت طعم دسم لذيذ للأكل.

خلصت أكلتنا مع الميلفيه مانجو الرهيب (95 جنيه). طبقات الميلفيه الرقيقة وبيهم المانجو، وعليها كريمة مخفوقة ومكعبات مانجو، وبينزل مع الطبق كاس فيه مكعبات مانجو تانية. الطبق صحيح شكله يبان بسيط بس معمول بمزاج وشكله يفتح النفس. والميزة كمان إن سكره مضبوط.

ممكن نوصف منيو المانجو عند لا جورمانديز بالابتكار أو الجمال أو قول زي ما تقول، المهم إنك هتنبسط. الفكرة إنهم مش حاطين المانجو كده وخلاص، واضح اهتمامهم بتركيبة الطبق وإزاي يدخلوا الفاكهة الجميلة اللي كلنا بنحبها في الأكل ويزود من حلاوة الأكل. أكيد مفيش مانع عندنا نرجع في زيارة تانية، بس إحنا دفعنا يومها حوالي 1400 جنيه، فطبعًا الموضوع مش رخيص.