The Definitive Guide to Living in the Capital , Cairo , Egypt

  • 296 شارع الترعة البولاقية أمام مدرسة الترعة شبرا مصر
  • 12:00 - 02:00
تم التقييم بواسطة
Mohamed Talaat
قيم
قيم الآن
لحوسة.. أحلى طواجن شيكولاتة هتاكلها في حياتك

في شارع الترعة البولاقية في شبرا، وبالتحديد عند المدرسة اللي قدام شارع خلوصي، فيه محل صغير كده اسمه “لحوسة”. المحل ده بيقدم مفهوم جديد للأكلات الحلوة، اللي بتعتمد على صوص الشيكولاتة والنوتيلا. وإحنا في كايرو 360 قررنا نجرب أكبر قدر من الأكلات اللي في المكان ده.. تجربوا معانا؟

وصلنا المحل بسهولة جدًا، كان واضح لنا إن المحل لسة جديد. وبالفعل عرفنا لما زورناه إن عمره 3 شهور بس، ومساحته صغيرة. اتفرجنا على المكان اللي ديكوراته تحسها واثقة من نفسها، وتقنعك بكاريزما المكان وبتميز فكر أصحابه. وأخدنا منيو وقررنا نجرب الأكل.

طلبنا مولتن كيك اللي مُطعّم بحلويات M&M’SK وقطع البوريو بسعر 28 جنيه. وكان الطعم حكاية، وبيدوب في البق. أما طاجن النوتيلا اللي بـ 30 جنيه، فكان كيك إسفنجي معمول بعناية مُطعم بشيكولاتة نوتيلا سايحة، مع حبيبات الفورماسيلا وكريم شانتيه. وكمان ممكن تضيف عليها الآيس كريم، ودي بقى طعمها مش قادرين نشرحه. ولكن نقدر نقول “أصل الطواجن النوتيلا هو لحوسة”.

أما بقى الوافل، فكانت مُطعمة بقطع السناكز وحبات الـ M&M’S، ومتغطية في النص بكراميل. والحقيقة يعني الطعم دوبنا وخلانا نعشق الوافل اللي معمول على أصوله. وكل ده بـ 15 جنيه. وكمان جربنا تشيز كيك فراولة، كانت حلوة ولكن مش بحلاوة اللي فات. ورغم إن سعرها 30 جنيه، ولكن كانت محتاجة أن يتخدم على المكونات أكتر، وكمان تبقى متماسكة عن ما كانت.

ندخل بقى على التقيل “طاجن لحوسيكو”، وده عبارة عن طاجن كبير سعره 120 جنيه. فيه مولتن كيك، مالتيزرس، M&M’S، قطع أوريو، شيكولاتة بيضاء، وافل، وكمان آيس كريم، حبيبات فورماسيلا مُطعمة بشيكولاتة بيضاء، نوتيلا، ومعاهم Fudge Cake علي آيس كريم.

وعندهم عرض إنك لو أكلت الطاجن ده وحدك هيبقى مجانًا ومش هتدفع فيه فلوس.

تجربتنا هناك كانت جميلة، وكلها لحوسة في جنة الشيكولاتة المدهشة.

المكان مميز وهيبقى له مستقبل في عالم الحلويات. وتقدروا تشوفوا صفحتهم من هنا. 

أحسن حاجة

طاجن لحوسيكو

أسوأ حاجة

التشيز كيك

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح