لندن فيش أند شيبس – London Fish & chips
لندن فيش أند شيبس: سي فوود طازة بسعر معقول في مول العرب
-
مول العرب – الفوود كورت
-
Angie El Batrawy
مافيش حد بيحب أكل الشوارع -خاصة الناس اللي سافرت بره- ما يعرفش الفيش أند شيبس – Fish & Chips، صوابع بطاطس سميكة مقلية ومعاها صوابع أو مكعبات كبيرة سمك مقلي برضه بيتقدموا في قرطاس ورق وبتاكلهم بالشوكة وأنت واقف، معاها Dipping أو بسلة مهروسة أو عليها صوص على حسب الطلب.. مافيش أسهل من كده.. أكلة مشبعة ومفيدة (بس مش من ناحية أنها مقلية).
تاريخها بيرجع للطبقة العاملة في إنجلترا نتيجة تطور خطوط السكك الحديدية اللي بتربط الموانئ بالمدن الصناعية الكبرى في النصف الثاني من القرن الـ 19، لما كانت الأسماك الطازة بتتنقل بسرعة للمناطق المكتظة بالسكان، وكانت بتُقدم في الأصل في أوراق الجرايد القديمة، لكن بطلوا وبقوا بيستخدموا الورق العادي غير المطبوع وعبوات الكرتون والبلاستيك بدلاً من الجرائد.
لندن فيش أند شيبس بدأوا سنة ٢٠٠١ في المملكة المتحدة، وفتحوا أول فرع لهم في السعودية تحت اسم “لندن سمك وبطاطا”، ومن النجاح اللي حققوه افتتحوا فروع كتيرة في كل مول هناك ووصلوا لأكتر من 15 فرع، وبعدها في ٢٠٠٤ افتتحوا أول فرع في مدينة دبي، والفرع بقى ٨ فروع، وأخيرًا وصلوا مصر بفرع واحد في فوود كورت مول العرب، وقريب في عمان.
شعارهم “Ocean to Kitchen” بدون إضافات أو ألوان صناعية، ريحة السمك باين عليها الـ Freshness وأنت واقف بتتفرج على المنيو الكبير جدًا ومليان تفاصيل لوجبات: سمك بس أو سمك وجمبري، أو سمك وجمبري وكاليماري مع بطاطس ومشروب، كون السمك والبطاطس (24 جنيه) وفيه طلبات جانبية زي سبرينج رولز الجمبري (20 جنيه)، أو قسم البطاطا المشوية اللي بتختار عليها من أول إضافة واحدة من الخضار لحد 6 إضافات، ده غير أن فيه وجبات فراخ كاستثناء لو حد معاه شخص ما بيحبش السمك، والحلو إما سويت تريو بالأوريو (14 جنيه) أو فطيرة تفاح (9 جنيه).
من المنيو الكبيرة والاختيارات الكتيرة استقرينا على وجبة بيج بن Big Ben بـ 59 جنيه ودي عبارة عن قطعة فيليه من السمك الطري المقرمش مع 6 حبات جمبري وبطاطس مقلية ومشروب، وكمان وجبة هايد بارك Hyde Park بـ 41 جنيه ودي عبارة عن 2 قطعة فيليه سمك مشوي متبل بالليمون والثوم والأعشاب مع بطاطس مقلية ومشروب، وأخيرًا بطاطس مخبوزة Baked potato بالزبدة والجبنة الموتزاريلا مع 2 إضافة من اختيارك (25 جنيه).
عقبال ما الأكل يتعمل الراجل على الكاونتر جهز لنا البطاطس المخبوزة، طلعها من الفرن وفتحها من فوق وحطها في طبق ورق وهرس قلب البطاطس مع الزبدة وجبنة موتزاريلا، وبعدين بيحط من فوق الإضافات اللي أنت اختارتها من سويت كورن، بنجر، خيار مخلل، بسلة وجزر بالمايونيز، فاصوليا حمراء، مشروم.. إلخ، وعاملين هاشتاج #eattheskin علشان يشجعوا الناس ياكلوا البطاطس بالقشرة (لأنها علميًا فيها فايدة البطاطس).
ريحة الأكل أول ما جه كانت تفرح، وشكل السمك والجمبري المقلي لونه ذهبي تفتح النفس، ما نقدرش نقول حاجة عن Freshness الأكل، والدليل على كده أنهم كمان قلوا الجمبري بديله، اللحم بتاع السمك والجمبري طعمه واضح والطبقة المقلية كانت متماسكة رغم أنها كانت منفصلة عن لحم السمك، والبطاطس المحمرة عادية كويسة، أما السمك المشوي كان طعمه حلو برضه بس ما حسيناش بطعم تتبيلة الليمون والثوم والأعشاب، البطاطس المخبوزة كان طعمها حلو جدًا والخضار اللي ضيفناه كان فريش، جربنا ناكل القشرة لكن كانت للأسف سميكة وطعمها مافيهوش أى نكهة.
لو نفسك تاكل سي فوود خاصة السمك بسعر وكمية معقولة، لندن فيش أند شيبس هيبقى من الاختيارات اللي لازم تيجي على بالك وأنت في زيارة لمول العرب.
