The Definitive Guide to Living in the Capital , Cairo , Egypt

«لو شانتيلي» هو واحد من مجموعة المطاعم السويسرية الموجودة في أحياء مختلفة من القاهرة زي «لو شاتو» و«لو شاليه» و«لا تشيزا». على المدخل الموجود في شارع بغداد في الكوربة مش هـ تلاقي اسم «لو شانتيلي» خالص، إنما هـ تلاقي كلمة Swiss Restaurants ولوجو كبير بالعلم السويسري. هـ يفتح لك باب المحل عامل في منتهى التهذيب وأول ما تدخل هـ تلاقي ثلاجة عرض الحلويات مخصصة للتيك آواي، وهـ تمشي في طرقة ضيقة لحد ما توصل لصالة الطعام الداخلية والمقسمة لـ 3 أجزاء: جزء مغلق مناسب جدًا للطقس البارد اللي إحنا فيه، وجزء مفتوح أشبه بتراس طويل، والجزء الثالث خاص بالبار. المكان راقي وكلاسيكي لأبعد الحدود، هدوء وجو رومانتيكي مش هـ تلاقيه في أي مكان إلا في الفنادق والمطاعم اللي على نفس الدرجة من العراقة. جرسونات بالزي الرسمي ومنيو عالمي شبه متخصص في الأكلات السويسرية والفرنسية. ديكورات بسيطة ومبهجة، حتى مفارش الترابيزات وألوانها كانت من عوامل الجذب بالنسبة لنا في المكان ده. أغاني الكريسماس في الخلفية كانت بـ تتلعب بمستوى صوت منخفض كفيل أنه يخليك في الموود من غير ما يسبب أي إزعاج. حتى رواد المكان حولنا كانوا أشبه بأرستقراطيين الخمسينيات والأجانب اللي عايشين في مصر من زمان.
4 منيوهات للمكان مش منيو واحد، الأول خاص بسهرات الكريسماس وهو منيو ثابت لفرد واحد بـ تختار فيه بين وجبتين رئيسيتين من لحم الديك الرومي أو الأسماك مع الشوربة والمقبلات والحلويات وكل المشروبات وده بسعر 165 جنيه. ومنيو ثاني للأطباق الرئيسية والمقبلات، ومنيو ثالث للساندويتشات، وآخر منيو للحلويات والمشروبات. بدأنا بطبق سلاطة دائري كبير (28 جنيه) مقسم لخانات فيها شرائح الجزر والطماطم والبنجر والبطاطس والعدس والبيض المسلوق مع صوص Thousand Island اللذيذ. من قائمة المختارات السويسرية طلبنا طبق ﭭـيل إيمانسيه زيوريكواز (95 جنيه) أو لحم البتلو بصوص الإيمانسيه على طريقة مدينة زيوريخ السويسرية مع قطع المشروم والأرز الأبيض والسوتيه. حرفية عالية جدًا في الطعم وطريقة التقديم، لكن الكميات كانت قليلة إلى حد ما. الكوردون بلو (65 جنيه) بلفائف الرومي الطازجة مع شرائح البطاطس المخبوزة أو Hashed Potatoes كان طبق رائع رغم أنه تقليدي جدًا.
لا تكتمل الوجبة في المطاعم السويسرية إلا بآيس كريم الفراولة اللي هم متخصصين فيه، وكان لازم نجرب الـ Coupe Wafer Fraise اللي هو 3 بولات آيس كريم فانيليا مع صوص الفراولة والمربى وقطع الفراولة الفريش اللي بـ تُقدم في سبت من بسكويت الويفر المقرمش (24 جنيه) ومش هـ نقول لكم قد إيه الطبق ده وهمي ومش شبه أي مكان ثاني وإزاي الناس بـ تيجي مخصوص علشان تجرب تخصصات الفراولة عند «لو شانتيلي». ممكن تختم وجبتك بفنجان قهوة أو ببراد شاي بمذاقات مختلفة بسعر 13 جنيه.
أكيد حبينا المكان جدًا وما عندناش أي تعليق على مستوى الخدمة أو النظافة أو الحرفية، تجربتنا في المطاعم السويسرية المختلفة حببتنا في سويسرا نفسها اللي عمرنا ما زرناها. وانتظرونا في زيارات قريبة لباقي مطاعم السلسلة العريقة في القاهرة.